MAGTIAYON TIPI SA GUBAT
SILINGAN SA GIDANGPAN SA ABU SAYYAF SA INABANGA
Inabanga, Bohol- Magtiayon nga silingan sa usa sa mga gidudahang sakop sa Abu Sayyaf sa Brgy. Napo ning lungsod nangamatay human napagan sa engkwentro tali sa bandidong grupo ug mga tropa sa kagamhanan.
Patay nang nakaplagan nga dunay mga samad pinusilan ang magtiayong Constancio, 66, ug Crisanta Petalco niadtong Miyerkules sa buntag gawas sa ilang balay atol sa clearing operation sa militar ug kapulisan.
Ang militar nagdumili una pagluwat og pamahayag niadtong higayuna kay wa pay mga kabanay nga nakakita sa lawas sa magtiayon.
Ang balay sa mga Petalco nahimutang mga 100 ka metros gikan sa balay ni Joselito Melloria, lumad nga taga Brgy. Napo nga naminyo og babayeng taga Zamboanga.
Siya ang gituohan nga maoy kuyog ug naggiya sa mga sakop Abu Sayyaf nga gipangulohan ni Muamar Askali, alyas Abu Rami.
Ang balay sa mga Petalco ug Melloria giuwang lang og umahan.
Nasayran sa Superbalita Cebu gikan sa mga silingan ug kabanay sa mga Petalco nga ang magtiayon lakip sa namakwit dihang naggubat na ang mga sakop sa Abu Sayyaf ug tropa sa kagamhanan sa Martes sa buntag, diin usa ka pulis ug tulo ka mga sundawo ang nangamatay.
Apan niadtong hapon sa Martes, nibalik si Constancio sa ilang balay aron pagsusi sa ilang hayopan nga wa nila madala.
Gusto ni Constancio nga panghipuson ang ilang hayopan.
Gibauran ni Constancio ang iyang asawa sa di pagkuyog kaniya apan nisunod gyud si Crisanta sa iyang bana sa pag-adto sa ilang pinuy-anan.
Wa mapugngi sa militar ug kapulisan ang magtiayon sa pagbalik sa ilang dapit bisan sa pahimangnon.
Wa sab matino kon nganong wa sila mahibalik.
Wa gisalikway ang posibilidad nga gihimong taming ang magtiayon sa mga sakop sa Abu Sayyaf.
Gituohan nga naigo sa crossfire ang magtiayon dihang nagsugod na sab ang engkwentro tali sa Abu Sayyaf ug militar niadtong Miyerkules sa kaadlawon.
Matod ni Captain Jojo Macariñas sa Philippine Army nga si Joselito pag-umangkon ni Constancio.
Wa nila isalikway nga symphatizer ang magtiayon kay nganong nagpabilin kini sa dapit bisan mga silingan gipabakwit na.
Apan ang mga kabanay sa mga Petalco nisalikway nga tigsuporta sa Abu Sayyaf ang magtiayon apan, nagduda sila nga si Joselito nahisakop sa bandidong grupo gikan sa Mindanao.
Sa interbyu sa Superbalita Cebu, way plano ang mga kabanay sa magtiayong Petalco nga mopasaka og kaso batok sa mga tropa sa kagamhanan.
Mga igsuon ni Crisanto nga sila si Natividad Cenabre, Marcosa Logroño ug Isabel Roturas ningpadayag sa kaguol sa nahitabo sa ilang igsuong lalake.
Matod nila nga ang ilang manghod ug ang asawa di mga sakop sa Abu Sayyaf.
Nasakitan sila kay namatyan pa sila, giakusahan pa ang ilang igsuon nga supporter sa Abu Sayyaf.
Mga kabanay nga nanambong sa lubong sa magtiayon niadtong Biyernes niingon nga ang duha way kasal-anan ug naatol lang nga didto kini sa ilang balay atol sa engkwentro.
Gilubong ang magtiayon nga wa makatambong ang ilang mga anak nga nanimuyo sa Manila ug Mindanao.
Nasakitan sila sa hitabo kay wa sila pangutan-a sa militar aron mahibaw-an kon terorista ba o di ang magtiayon nga pulos na mga tiguwang.
Gawas pa, si Crisanta ilang gihulagway nga maglisod na gani sa paglakaw tungod sa kabako.
Bisan mga silingan sa magtiayon nanalipod kanila samtang ningpadayag sa ilang kasubo, uban kanila naghilak, sa gidangatan sa mga Petalco.
Matod sa mga residente nga niadtong Martes way nagpahibawo kanila nga dunay Abu Sayyaf nga nakasulod sa ilang sityo.
Nakadungog sila og mga buto sa armas apan, nagtuo sila nga dunay nagdaob og kawayan, labina nga nakakita sila og aso.
Diha na sila masayod nga engkwentro na kadto human sa buto-buto. /