2 PATAY, 12 SIKOP SA DRUG RAIDS

Duha patay ug 12 ang nasikop human sa managlahing operasyon sa kapulisan batok ilegal nga drugas sa Semana Santa.

DANAO CITY

Sa dakbayan sa Danao, patay si Nino Lee Batiquin, kinsa dunay nag-ung-ong nga

warrant of arrest sa mga kaso sa carnapping, pagpanglungkab ug pagpangawat sa Danao ug Carmen human kini nakigpinusilay sa kapulisan.

Alas 11:05 sa gabii niadtong Huwebes dihang nihimo og

joint operation ang Danao City ug Carmen Police Station aron masikop ang suspek.

Nabantayan si Batiquin sa Taboc, Camaligbato, Danao aron i- serve ang warrant apan nidagan kini ug nitago sa usa ka panimalay sa dapit. Gipabuthan ang kapulisan busa nahitabo ang pinusilay.

Nadala ang suspek sa Danao City Cebu Provincial Hospital apan gideklarang patay na.

Nasayran nga nalambigit usab si Batiquin sa pamaligya og gidiling drugas.

Nasakmit gikan kaniya ang kalibre .357 revolver, nagkadaiyang bala sa .357, .38, 11 ka gagmay nga pakete sa shabu.

Sa susamang dakbayan, nasikop sila si Irish Damuag Mimites, 28 ug Jeson Langita Asister, 26 kinsa parehong residente sa Taboc, Looc.

Nakuha sa duruha pinaagi sa buy bust operation ang 10 ka gagmay nga pakete sa shabu, laing duha ka gagmay nga pakete, P1,800 nga kwarta nga gituohang halin sa ilegal nga drugas ug laing lima ka pakete sa shabu.

Anaa sa 10.64 ka gramos ang kinatibuk-an nga nasakmit diin nagkantidad kini og P125,552 base sa Dangerous Drugs Board (DDB) value.

CONSOLACION

Samtang sa lungsod sa Consolacion, dihang napatay sa duha ka mga killer si Jeffrey Abalos Montellano alyas Ilong, 38, sa pagpamusil nga nahitabo sa Barangay Polog, Consolacion alas 9:30 sa buntag niadtong Miyerkules.

Ang mga suspek naila nga sila si John Kerry Balaba, alyas Barat kinsa padayon karon nga gipangita sa kapulisan, ug si Cryztal Lozano Ranile, 19.

Sa imbestigasyon sa kapulisan, usa ka PO1 Alvin Canoog nga nagpuyo sa dapit ug nadestino sa Tuburan Police Station ang nitaho sa estasyon kabahin sa insidente.

Base sa impormasyon ni Canoog nga sa wa pa mamatay ang biktima nga si Montellano, nitug-an kini kaniya kinsa ang gapusil niya.

Gitudlo si Balaba ug dihang gibisita ang balay niini sa kapulisan, wala kini didto ug nasikop ang uyab niini nga si Ranile kinsa nakuhaan og usa ka pakete sa shabu.

LAPU-LAPU CITY

Unom ka mga tawo ang nasikop sa dakbayan sa LapuLapu nga nalambigit sa ilegal nga drugas, lakip na ang 17 anyos nga menor sa tulo ka managlahing buy-bust operation niadtong Huwebes Santo ug kagahapon.

Kagahapon sa Sitio Kadulang, Brgy. Marigondon, nasikop ang si Emil Garret Baba, 31, human nibaligya sa usa ka pakete sa shabu sa pulis nga poseur-buyer bugti sa P300.

Lakip sa nasikop sa operasyon mao si Al Paypa Violanda, 45 anyos nga taga Sitio Sangi- New Road, Brgy. Pajo sa dakbayan. Siya anaa sa balay ni Baba atol sa operasyon.

Matod ni Lapu-Lapu City Police Station 4 chief Sinsp. Alcon Escosura, nga 10 ka gagmayng pakete sa shabu, P400 nga kinitaan ang nakuha gikan ni Baba samtang duha ka pakete ang nakuha gikan ni Violanda.

Niadtong Huwebes Santo, duha ka magsuong lalake ang nasikop nga namaligya og iligal nga drugas nga may dalang armas sa Sitio Humay-Humay, Brgy. Pajo.

Wa na makaipsot pa sa kapulisan sa operasyon sila si John Paul Kababanay, 24 ug iyang manghod nga lalake.

Matod sa city intelligence

branch head Sinsp. Joey Bicoy nga si John Paul maoy napalitan og usa ka pakete sa gituohang shabu sa police decoy.

Sa paghimo og body search sa operatiba, nakuhaan ang mga suspek og usa ka pouch nga may 20 ka gagmay, duha ka medium nga pakete sa shabu, usa ka S &W cal. 357 revolver nga may 5 ka buhing bala ug P900 nga gituohang kinitaan,

Gidakop usab sa kapulisan ang manghud ni John Paul nga nakuhaan og P300 ug duha ka medium nga pakete sa shabu apan gi-trun over iyang manhud sa DSWD.

Giingong motimbang ang shabu og 20.84 gramos nga mobalor og P245,912 gikan sa magsuon.

Sa dalan A. Tumulak sa Barangay Gun-ob, mokabat sa P18,880 nga balor sa shabu ang

nakuha gikan sa 24 anyos nga si Kristoffer Boiser ug 25 anyos nga si Wilmar Comendador sa Punta Rizal St., Barangay Poblacion.

Nasikop ang duha ka suspek sa dihang napalitan og usa ka pakete sa shabu.

Human gikapkapan, nakuhaan si Boiser og 11 ka pakete sa shabu ug P800 cash samtang si Comendador nakuhaan og unom ka pakete sa shabu ug P300.

Ang tanang suspek kasamtangang gibalhug sa detention cell sa LLCPO.

ALCOY

Sa lungsod sa Alcoy dihang nasikop usab sila si Jose Tabera, 45 residente sa Sugbo ug si Jerryfer Peregrino, 42 residente sa Bato, Leyte.

Ang duha sakay sa Mazda nga sakyanan dihang niagi kini sa checkpoint operation sa Alcoy Police sa Barangay Poblacion, Alcoy, alas 11:30 sa buntag niadtong Huwebes.

Dihang gipangayuan kini og lisensiya, aksidente nga nakitang kalibre 45, usa ka magazine nga adunay unom ka bala ug usa ka medium size nga pakete sa shabu. Daling gipusasan ang duha ug gitanggong sa Alcoy Police Station.