3 patay, 2 angol sa aksidente sa dan

Tulo ang patay samtang duha ang ang angol sa aksidente sa kadalanan diin aduna kini'y kalambigitan sa motorsiklo sa managlahing dapit sa lalawigan sa Sugbo.

Niadtong Huwebes dihang patay ang duha ka mga angkas ni Christian Mascardo, 15, estudyante, residente sa Sitio Toong, Barangay Tuburan lungsod sa Tuburan human nawagtangan kini og kontrol sa iyang gimaneho nga motorsiklo ug nibangga sa kahoy nga Mahogany.

Alas 10:00 sa gabii niadtong Huwebes dihang nagbiyahe gikan sa national highway sa Tabuelan paingon unta sa Tuburan Proper sila si Mascardo uban ang mga angkas niini nga sila si Andrew Matugas, 16, ug Maria Fe Comilang, kinsa mga silingan ra pud niini.

Dihang naabot sila sa kurbada nga dapit sa Sitio Molopolo, Barangay Bagasawe, Tuburan, nawagtangan og kontrol si Mascardo ug nalahos kilid sa dalan ug nabangga sa kahoy nga Mahogany.

Tungod sa grabeng impact, nalabay sila si Matugas ug Comilang.

Samtang ang motorsiklo nagtuyoktuyok kini sa dalan, dihang niagi usab si Jomar Lumapas, 18, sakay ang motorsiklo niini ug nadumbolan ang motor ni Mascardo nga anaa sa dalan hinungdan nga nasukamod usab kini.

Dead-on-arrival (DOA) sila si Matugas ug Comilang dihang nadala sa Tuburan District Hospital samtang padayon nga nagpaalim ang mga driver sa duha ka motor.

Nasayran nga wala'y mga lisensiya ang parehong driver ug wala'y plate number ang mga dala niini nga motor.

Sa lungsod sa Borbon dihang patay usab si Gregorio Nuñeza Boto, 29, residente sa Sitio Catang Barangay Agsuwao lungsod sa Catmon dihang paingon unta mopauli niadtong Miyerkules sa gabii.

Sa imbestigasyon sa Borbon Police nasayran nga nagbiyahe padulong sa norte si Boto dihang niagi kini sa Sitio Canlagang, Barangay Don G. Antigua, lungsod sa Borbon pasado alas 10:00 sa gabii.

Paingon na unta pauli ang biktima dihang nakaagi siya sa maong dan nga kasamtangan nga gi-ayo.

Tungod kay aduna'y mga gamit alang sa pag-ayo sa dan ang naa sa dapit, kini hinungdan nga nawagtangan siya og kontrol.

Naaksidente kini ug nalabay pipila ka metros ang iyang motorsiklo.

Nakaangkon og nagkadaiyang samad sa ulo si Boto hinungdan sa iyang hinanali nga kamatayon.

Nadala pa siya sa Dosado Memorial Medical Hospital sa Damolog, Sogod apan gideklarar kini nga patay. /