POST SA FB NAKAANI OG TABANG
Human nag-viral ang hulagway sa magsuong Ella Mae ug John Michael Belida, nag-abot-abot ang mga gasa nga ilang nadawat gikan sa mga pribadong donor ug kagamhanan sa lungsod sa Asturias nga natandog sa ilang sugilanon.
Ang makapatandog nga hulagway nagpakita sa magsuon diin giba ni JM ang iyang manghod nga si Ella atol sa ilang graduation niadtong Aril 7 sa Looc Norte Elementary School sa lungsod sa Asturias.
Matod ni Estrella Belida, 38, inahan sa mga bata, sukad nigawas ang hulagway sa social media nga gi-post ni Leonard Nuñez, ilang silingan, nagabotang mga gasa nga gihatag sa mga pribadong indibiduwal nga natandog ug nadasig sa determinasyon nila ni Ella ug JM nga nag-antos aron makahuman og eskwela.
Si Estrella niasoy nga upat tanan ka mga wheelchair ug crutches ang nadawat ni Ella samtang si JM gihatagan og bisikleta.
Gawas niini, ang magsuon nakadawat usab og bag ug school supplies.
Ang usa sa mga naghatag sa wheelchair kay atua manarbaho sa Guam.
Ang kagamhanan sa Asturias pinangulohan ni Mayor Jose Antonio Pintor gawas sa medical checkup, nihatag usab og wheelchair ni Ella.
Matod ni JM ang usa ka wheelchair ibilin nila sa tunghaan aron maoy magamit sa iyang manghod kon naa sud sa classroom.
Gikan sa Grade 1 hangtod sa ilang pag- graduate sa Grade 6, si JM na ang nagsilbi nga mga tiil ni Ella sa pagpadung sa tunghaan ug pagpauli sa ilang balay.
Ang 12-anyos nga dalagita maglisod og lakaw sukad sa unang mga tuig sa iyang pagkahimugso.
Si Estrella niasoy nga 11 ka buwan pa lang si Ella dihang natagak kini ngadto sa ubos gikan sa iyang nahimutangan mga tulo ka tiil ang gitas-on.
Ang ginang nisugilon nga sukad sa aksidente, nagkalibang ug nagbalikbalik ang hilanat ni Ella.
Nakalakaw pa kini samtang nagtubo, apan niabot ang adlaw nga maglisod na og lakaw si Ella ug kinahanglan na kini bahon sa iyang mga maguwang.
Si Asturias information officer Christian Conejo niingon nga dunay kahigayonan nga makalakaw og balik si Ella kay sigon ni Asturias municipal health officer Rizaldy Climaco, severe potassium deficiency ang nasinati sa dalagita.
Gawas ni Ella, ang iyang 3-anyos nga manghod nga lalake ang di usab makalakaw, kinsa natagak usab sa dihang pito ka buwan pa lang. /