BIRTHDAY NA, AWARDEE PA
Duha ka mga gasa ang nadawat ni Zerah Eloise Colegado atol sa ilang graduation sa preschool sa Lagtang Day Care Center sa Barangay Lagtang, dakbayan sa Talisay, habagatang Sugbo.
Kini duha ka adlaw human sa ikaupat ka tuig nga adlawng natawhan sa bata niadtong Abril 4, 2017.
Apan sa wala pa ang dako nga selebrasyon, gisugat og dako nga pagsulay ang ilang pamilya.
Si Eloise, kaduha na- admit sa ospital sa miaging buwan.
Una, niadtong Marso 4, gumikan sa pneumonia.
Nalandig na usab siya sa tambalanan pagka Marso 27 tungod sa urinary tract infections (UTI).
Naluya ang lawas sa bata ug kini nakapabalaka sa iyang mga ginikanan nga sila si Celso ug Lavella Colegado.
Sila nag-ampo sa Ginuo nga maayo ang ilang anak sa gihambin nga sakit.
Ang ilang pag-ampo gidungog sa Ginuo diin naayo sa balatian ang bata sa wala pa ang iyang birthday ug duna pa kini pakapin nga duha ka mga gasa- ang iyang duha ka awards sa tunghaan.
Atol sa graduation day ni Eloise sa Lagtang Day Care Center niadtong Abril 6, 2017, usa si Eloise sa mga gipasidunggan isip Outstanding Pupil ug Most Attentive sa ilang klase.
Niadtong Abril 9, giusa nila ni Celso ug Lavella ang selebrasyon sa birthday ug graduation ni Eloise sa salosalo nga gipahigayon sa ilang panimalay sa Barangay Lagtang kauban ang mga higala sa bata ug mga kabanay ug higala sa mga ginikanan. /