PLAYOFFS NA!
Human sa tungason nga dalan sa regular season, 16 ka teams – walo sa East ug walo sab West – ang nahabilin ug magpadayon sa ilang kampanya alang sa mas malisod nga tahas sa National Basketball Association (NBA) – ang playoffs.
Ang defending champion Cleveland Cavaliers ug si LeBron James nagtuo nga andam na silang modepensa sa ilang korona samtang ang Golden State Warriors pursigidong mobawi sa titulo nga giilog sa Cavaliers gikan kanila.
Ang Cavaliers maoy unang mopakita og aksyon diin isip No.2 sa Eastern Conference, ilang i-host ang No.7 Indiana Pacers sa best-of-seven series. Ang Cavaliers maoy maggunit sa homecourt advantage ning maong series.
Gikan man tuod sa upat ka sunodsunod nga pilde ang Cavaliers sa tumoy sa regular
season apan wala kini nakaapekto sa ilang determinasyon ug pagsalig nga madepensaan ang titulo.
“We have good chance to win it all. So we have to be very determined but we have to be very smart about our game plan and how we execute. Through everything that went on with our team, we’re in a position where we can do something special still,” matod ni James. Taas ang moral sa Cavaliers ning maong series gumikan kay sa upat nila ka mga duwa batok sa Pacers sa regular season, katulo sila nakaposte og
kadaugan.
“I’m not going to harp on about what happened in the regular season through injuries, through good wins, through bad losses,” dugang ni James.
“We have a good club going to the postseason and that’s all I can ask for right now. At the end of the day I can’t have my mind focused on the past right now. The present is the only thing that matters.”
Sa makasaysayong NBA Finals sa miaging tuig, napangulohan ug nadasig ni James ang Cavaliers sa pagbangon gikan sa 1-3 nga biya sa series ug pakagingon ang Warriors sa deciding Game 7 aron langkaton ang labing una nilang titulo.
Ning higayuna, gituohang ipabarog na sab ni James ang iyang liderato sa pag-agak sa Cavaliers sa grabe ka lisod nga mga kombating sagubangon
niini sa playoffs. “Preparing this group, getting us locked in, and understanding what our opportunity is,” pasabot ni James. “Let’s get ready to go. Nothing changes for me. I’ve got to be the leader of this team every time I step on the floor.”
Ang labing lisod nga agianan nga posibleng maagian sa Cavaliers sa ilang tinguha nga madepensaan ang titulo mao ang mas milig-on nga puwersa sa Warriors, nga pangulohan nila ni Stephen Curry, Klay Thompson ug Kevin Durant. Magsugod sab karon ang
best-of-seven series tali sa No.3 Toronto Raptors batok No.6 Milwaukee Bucks sa Eastern Conference ug ang mga engkuwentro sa Western Conference tali sa No.2 San Antonio Spurs batok No.7 Memphis Grizzlies ug No.4 Los Angeles Clippers batok No.5 Utah Jazz.