9 PATAY NI CRISING
BAHA SA SIYUDAD SA DANAO, LUNGSOD SA CARMEN, METRO CEBU
Siyam ang kompirmadong patay samtang kapin sa 10,000 ka mga tawo ang gipabakwit sa lungsod sa Carmen ug dakbayan sa Danao subay na sa nahitabo nga grabeng bunok sa uwan tungod sa bagyong Crising nga karon usa nalang ka low pressure area (LPA). CARMEN
Sa lungsod sa Carmen, walo ka mga patay ang natala sa kapulisan lakip niini ang inahan ug duha ka anak niini nga nadala sa baha.
Patay si Rowena Sencio, 38, ug iyang duha ka anak nga sila si Jade, 13 ug Ivan, 11, residente sa Barangay Ipil, human naanod kini sa baha samtang natulog kagahapon sa kaadlawon.
Matod ni SPO2 Simplicio Gibo sa Carmen Police nga nadala ang panimalay sa pamilyang Sencio tungod kay anaa kini kilid sa sapa.
Anaa na sa Barangay Dawis Norte, duha ka kilometro gikan sa ilang panimalay narekober ang patayng lawas sa mag-inahan.
Patay usab si Arsenia Laping, 58, ug ang apo niini nga si Vience Ian Durano, 2, residente sa Sitio Dualog, Barangay Poblacion human naanod usab kini sa baha.
Lakip sa nakabsan sa pagbaha si Yanina Isabel Hermocilla, 6, taga Sitio Bodega, Poblacion, Carmen.
Nailhan usab kagahapon ang patay nga taga Barangay Triumfo human malunod sa baha ug napalgan ang lawas niini sa Barangay Dawis Norte nga si Zobella Gica, 46.
Si Nicolas Pongaotan, 76, taga Sun-oc, Puente, patay human siya makuryentehan sa natumba nga poste sa kuryente.
Kritikal usab ang manghod niini nga si Gorgonia Pongaotan, 70, kinsa giingon nga kuyog sa iyang igsuon nga nanakop sa manok nga naanod sa baha.
DANAO CITY
Patay si Virgina Manolat, 70, human gianod sa baha samtang natulog sa ilang panimalay sa Barangay Cagat-Lamac, Danao.
Matod sa tigpamaba sa Provincial Disaster Risk Reduction Management Office (PDRRMO) nga si Julius Regner nga dunay duha ka missing sila nga gipangita sa lungsod sa Carmen nga managtiayon kini.
Sa pagkutlo ning balita, wa pa kini makit-i.
Sa 10,000 ka evacuees, 9,000 niini taga lungsod sa Carmen ug sagad niini nakauli na sa ilang panimalay kagahapon sa udto.
Padayon pa nilang gikolekta ang datus sa mga biktima ug casualties aron makaapudapod sila og hinabang.
MINGLANILLA
Nahugno ang tent samtang gipalandungan kini sa mga manan-aw unta sa sikat nga Sugat-Kabanhawan Festival sa Minglanilla.
Adunay natala nga 10 ka tawo ang samdan human nahugno ang tent tungod sa kabug-at sa tubig nga napundo niini pasado alas 12:00 sa kaadlawon kagahapon.
MANDAUE C ITY
Di mominos sa 300 ka mga indibidwal gikan sa nagkadaiyang barangay sa dakbayan sa Mandaue ang gipabakwit sa City Disaster Risk Reduction and Management Office (CDRRMO) tungod sa pagbaha ug walo ka barangay ang grabeng nabahaan: Cabancalan, Tipolo, Banilad, Paknaan, Mantuyong, Labogon, Tingub, ug Basak.
Cebu City
Di mominos 20 ka barangay sa downtown ug coastal barangay ang gibaha. Kini ang Sto. Niño diin nahimutang ang dalan Colon, San Antonio, Kamagayan,Parian, Lorega San Miguel, Carreta, T. Padilla, Tejero, Mabolo, Tinago, Zapatera, San Roque, Pasil, Ermita, Sawang Calero, Duljo Fatima, Mambaling, Basak San Nicolas, Basak Pardo, Kinasang-an, Cogon Pardo, Poblacion Pardo, Inayawan, ug Bulacao.