LAGTANG BRGY. CAPTAIN GIDAKOP
Gipusasan ang barangay kapitan sa Lagtang, dakbayan sa Talisay human nakuhaag armas, daghang bala ug granada sud sa iyang panimalay kagahapon sa alas 8:45 sa buntag sa Kishanta Road sa nahisgutang dapit.
Si Kapitan Mark Ferdinand 'Denden' Bas, 41, minyo sa nahisgutang barangay gipusasan nila ni P/Supt. Joie Yape, Jr., hepe sa Provincial Intelligence Branch (PIB) sa Cebu Provincial Police Office (CPPO), nga nangulo sa hiniusang operasyon sa Special Weapons and Tactics (SWATteam-CPPO), Provincial Public Safety Company (PPSC) Talisay Police ug Regional Special Operations (RSOG) 7.
Si Bas nakuhaan sud sa panimalay og usa ka hand granade, 42 ka bala sa kalibre .45, lakip sa 12 ka kabhang sa kalibre .45, usa ka caliber .22 magnum, 42 ka bala sa cal. 22, laing 5 ka kabhang sa cal. 22, tulo ka magazine saa kalibre .45.
Gironda ang panimalay ni Bas pinasikad sa search warrant nga giisyu ni Judge Jerry Dicican sa Regional Trial Court (RTC) branch 25, sa dakbayan sa Danao, nga gipitsahan niadtong Abril 7, 2017, may kalambigitan sa paghupot niinig mga tag-as nga armas nga way lisensiya, bala, ingon man eksplosibo.
Si P/SInsp. Nazarino, deputy Chief sa PIB, nga nahinabi sa mga tigbalita, nagkanayon nga usa ka buwan nilang gi-monitor si Bas, human sila nakadawat og impormasyon kabahin sa paghupot niini og mga tag-as nga armas.
Ang impormasyon nagbutyag nga dunay gihuptan nga KG-9 sub-machine pistol, kalibre .45 ug uban pa nga armas nga way lisensiya.
Si Bas, kinsa nahinabi usab sa Superbalita Cebu, nagkanayon nga pulitika ang nagpaluyo sa pagpangronda sa iyang iyang panimalay diin dunay mga kaatbang nila nga gusto siyang dauton.
Matud pa niini nga wa siyay laing nakitang basihan kun di pulitika kay wa man siyay mga nakaaway sa ilang lugar, bisan tuod kon daghang mga drug user ug drug pusher nga napadakop.
Sa intelligence report sa Talisay City Police Station nakita nga si Bas ikaupat sa watch list sa gidiling drugas diin nalakip siya sa high value target (HVT).
Sa intelligence report si Bas, nalakip sa grupo sa bigtime druglord nga si Franz Sabalones, diin ubos kini sa payong sa naila sab nga druglord nga si Steve Go, kinsa nabilanggo karon sa Maghaway.
Samtang, high value target sa Talisay usa sa upat ka mga tawo nga nasikop sa buy-bust operation kapulisan sa managlahing dapit niadtong Sabado, usa niini menor de edad.
Ang unang operasyon sa Sityo Rattan sa Tangke, pasado alas 4:00 sa hapon human sila makadawat og report nga bisan og Semana Santa way hunong ang pagpamaligyag shabu sa lugar.
Nasikop sila si Reymart Padillo, 18; Edwin Libres Reponte, 48, ug usa ka 17 anyos nga pulos taga didto ra usab sa lugar.
Dul-an sa P10,000 nga shabu ang nasakmit gikan sa mga suspek.
Pasado alas 7:00 sa gabii sa samang adlaw, ang mga operatiba miadto usab sa sityo Hawod, Bulacao.
Usa ka Herman Legaspi Alcantara, 40, dunay kapuyo ug taga Dumlog, Talisay gitumbok nga usa sa 10 ka high value target sa ilang dapit ang nasikop.
Naabtan sa akto nga ang suspek naghupot pag shabu nga motimbang og pito gramos nga mokantidad og dul-an sa P100,000.
LAPU-LAPU CITY
Drugas nga hapit moabot ngadto sa P100,000 nga kantidad, armas ug mga pabuto ang nakuha sa kapulisan sa Lapu-Lapu human nitubag sa alarma kalabot sa usa ka armadong tawo sa Sitio Saac I, Barangay Buaya, dakbayan sa Lapu-Lapu niadtong Sabado sa hapon.
Giila ang suspek nga si Jason Ryan De Ocampo, 22, minyo ug molupyo sa dapit.
Matod ni P/SInsp. Joey Bicoy sa City Intelligence Branch nga usa ka concerned citizen ang nanawag sa ilang buhatan kalabot sa armadong tawo busa gilusad ang operasyon./