PERSONS OF INTEREST SI JOSELITO MELLORIA
Persons of interest na sa kapulisan ug mga sundawo sa lalawigan sa Bohol silang Joselito Melloria ug ang iyang asawa nga pulos miyembro sa Abu Sayyaf nga maoy naengkwentro sa militar niadtong Lunes sa kaadlawon.
Si P/SSupt. Felipe Natividad, hepe sa Bohol Provincial Police Office, nagkanayon nga nagpadayon karon ang manhunt operation niining magtiayon lakip na ang giingong mga kauban nga miuban sa pag-ikyas.
“On-going yung clearing operations natin, naka-contain lang sila sa isang lugar,” matod ni Natividad.
Usa sa mga opisyal sa militar ang di magpahingan mitugan sa Superbalita Cebu nga ila nang gisubay ang mga posibling gitagoan sa nagpabiling buhi nga mga sakop sa Abu Sayyaf.
Matod niya nga si Joselito naa ra nagtago sa kabukiran sa lungsod sa Inabanga ug base sa report sa mga residente samdan kini.
Lakip sa iyang gitug-an nga samdan si Joselito ug nangayo na kini og panabang sa iyang mga kaila sa bukid.
“Naa ra man na siya nagtuyok-tuyok diri, kauban niya katong naengkwentro namo,” matod sa military official.
Ang ginikanan ni Joselito naa na matod pa sa kustodiya sa PNP ug gipaubos na sa imbestigasyon.
Ang Bohol PPO mipakatap na usab sa hulagway ni Melloria sa tanang police station ug kun ila kining masigpatan motawag gilayon sa labing duol nga police station.
Sukod karong adlawa ipakatap na sa Police Regional Office 7 ang dul-an upat ka libo ka mga police sa tibuok lalawigan sa Bohol nunot sa Asean meetings nga magsugod sa Abril 19 ngadto sa petsa 22 sa isla sa Panglao.
Mangunay mismo sa pagpakatap sa mga police si P/ CSupt. Noli Taliño ug sud sa usa ka semana sa Bohol magkampo si Taliño.
Matod ni Natividad nga way angayan nga kabalak-an sa publiko labot sa hulga sa Abu Sayyaf sanglit isolated lang kini.
Apan gisaka pa nila ang ilang alert status tungod sa insidente sa engkwentro sa ASG sa Bohol.
Tanang assets sa Armed Forces of the Philippines gipadala na didto sa lalawigan sa Bohol.
Gipanghimakak sa PNP ang mikatap sa social media labot sa pagdagsang sa Abu Sayyaf sa Bohol ug Cebu sanglit wala kini kamatuoran.
Awhag sa PRO 7 nga kun dunay madawat nga kasayoran itaho dayon kini sa kapulisan ug di i-post sa Facebook nga makahatag og kahadlok sa publiko. /