Dan sa Brgy. Manipis di maagian sa mga sakyanan

Gumikan sa kusog nga uwan niadtong Sabado sa gabii hangtod na kagahapon sa buntag mugna sa bagyong Crising ang dan sa Barangay Manipis, dakbayan sa Talisay di na usab maagian sa mga sakyanan bisan pa gani og motorsiklo.

Samtang ang barangay kapitan mismo nga si Kapitan Emma Cabiluna mipadayag na sa iyang kabalaka nga mismo ang iyang balay kuyaw na nga mahugno.

Gibutyag ni Kapitan Cabiluna nga ning higayona di na bato ang midahili kon di mga lapok na nga gikan sa ibabaw nga mikatag sa ubos nga bahin.

Matod ni Cabiluna ang Sityo Lower Campo 6 mao karoy grabeng naapektuhan tungod sa kataas na sa lapok nga miabot sa karsada.

Usa sa iyang gikabalak-an nga kon di kini nahawanan adunay patay nga di malubong sanglit dili man maagian ang ilang lugar.

Hangtod sa paghimo ning balita wa pa mahawani ang dapit sa kontraktor nga naghimo sa karsada ang QM Builders.

Nagkanayon si Cabiluna nga iya nang gitawgan ang kontraktor aron hangyuon nga mahawanan ang karsada sa taas kaayong lapok.

Iya usab nga gibutyag nga mismo ang iyang balay delikado nga mahugno tungod kay nagbitay na ang pundasyon human usab naguba ang riprap ug miresulta sa pagkahumok sa yuta.

“Mao gyud na akong problema karon ingon man tong kontraktor nga ila kunong ayuhon ang riprap hangtod karon wa paman,” matod ni Cabiluna.

Ang dan sa Manipis maoy nagdugtong sa karsada paingon sa siyudad sa Toledo.

Giayo ang karsada aron tarong ning maagian alang niadtong mobiyahe sa Toledo apan sa matag dunay uwan maapektuhan kini

Apan ning higayona miawhag si Cabiluna nga adto lang una moagi ang mga motorista sa Barangay Uling, siyudad sa Naga.