Sunog miigo sa Tisa, Guadalupe

Nagluto og siomai ug electrical faulty wiring ang hinungdan sa duha ka sunog nga miigo sa siyudad bisan pa man sa nagbunok nga uwan sa milabayng gabii.

Ang unang alarma nadawat alas 10:04 sa gabii sa Sityo Kaduloy, Barangay Tisa, dakbayan sa Sugbo ug nakontrolar alas 10:20 sa gabii.

Ang sunog didto magsugod sa balay ni Julius Quillosa, usa ka negosyante og siomai.

Ang ikaduhang sunog nahitabo sa Sityo Greenville, V. Rama St., Barangay Guadalupe, dakbayan sa Sugbo, ang alarma nadawat alas 12:28 sa tungang gabii ug nakontrolar alas 12:54 sa panimalay ni Catalino Maglasang.

Sa pasiunang imbestigasyon ni SFO1 Dionesio Ragaza sa Cebu City Fire Station nga ang usa sa anak ni Quillosa galuto og fried siomai.

Apan sa wa pa masayri nga hinungdan kalit gidakop sa kayo ang init nga mantika sud sa kaha.

Wa na matabang ang pag-ulbo sa kusina hinungdan nga nanggawas ang mga tawo sud sa balay.

Usa ka laing panimalay sa silingan ang naugdaw ug laing panimalay ang nakan-a og diyotay sa kayo diin nagbilin og danyos nga P80,000.

Matud ni Ragaza nga ang kusog nga pagbunok sa uwan nakatabang sa kabomberohan human mahumod sa tubig uwan ang kasikbit nga kabalayan.

Samtang aso na lang ang nakita sa wa pa makaulbo ang kayo sa balay ni Maglasang.

Dihay alegasyon nga may tawo ang panimalay samtang adunay uban nga mialegar nga way tawo ang panimalay nga ginama sa light materials.

Gibana-bana nga moabot sa P60,000 ang danyos sa sunog nga miugdaw og pito ka balay ug duha ang nakan-an sa kayo.

Ang kabomberohan mohimo pa og dugang imbestigasyon pagtino sa hinungdan sa duha ka sunog. /