Gubat, bagyo sa Semana Santa

Duha ka dagkong panghitabo ang atong nasinati sa nakalabay nga Semana Santa. Samtang nangandam kita sa daghang gimbuhaton sa niaging Semana Santa gitay-og kita sa gubat didto sa lungsod sa Inabanga sa lalawigan sa Bohol. Mga bandidong grupong Abu Sayyaf gikaengkwentro sa sa militar ug kapulisan nga nikalas ug daghang kinabuhi. Daghang sibilyan namakwit ug nahasol sa maong panghitabo.

Kita dinhi sa Sugbo nahasol sab tungod sa mga estorya sa pagpamomba nga nikatap sa internet. Sa dayon nang tapos sa Semana Santa laing pagpanghasi ang atong natagamtaman. Ang ba�yong Crising nga nakapaapiki sa mga nagbakasyon sa mga isla human gipugngan ang pagpa biyahe sa mga sakyanan sa dagat. Nag-una sa mgac naapiki mao ang gatosan ka mga pasahero nga natanggong sa isla sa Bantayan.

Gawas sa mga pasahero naapiki sab ang daghang molopyo ug motorista tungod sa grabing ulan nga nasinati niadtong Sabado sa gabii hangtod lapas sa tungang gabii sa adlaw’ng Domingo nga mao ang Pasko sa Pagka banhaw. Bisan pa niini ang simbahang Katoliko nipadayon gihapon sa naandan nga Sugat.

Ang pait kay sa wa pa magsugod ang Sugat sa Minglanilla may nangaangol human sa disgrasya nga nahitabo sa stage nga pahigayonan sa tinuig nga kalihukan. Pagka buntag maoy namat-an sa mga motorista ang mga karsada nga di maagian. Usa ini ang karsada nga nagdugtong sa Barangay Basak Pardo ug Cogon Pardo sa dakbayan sa Sugbo kay gisanapan sa tubig.

Sa internet makita ang makaluluoy nga kahimtang sa mga panimalay nga gisanapan sa tubig. Di sab makalimtan sa mga molupyo sa Mandaue City ug Cebu City kay samtang nibunok ang kusog nga ulan niulbo sab ang alarma sa sunog. Ingon niini ka pait ang kahimtang sa mga biktima sa baha ug sunog nga pulos nanghitabo sa dayon nang tapos sa Semana Santa. Di ba nag-asoy man ta dinhi sa wa pa ang Semana Santa nga iapil nato og pangaliya ang kinaiyahan nga hilabihan kaayo katalandugon. Sa maong asoy wa pa naghisgot og low pressure area ang taga Pag-asa.