US kumplot sa Abu Sayyaf?
Niakusar ang Communist Party of the Philippines (CPP) nga ang Estados Unidos maoy nagpaluyo sa pagsud sa Abu Sayyaf didto sa Barangay Napo, lungsod sa Inabanga, lalawigan sa Bohol.
Matod pa sa taho sa Inquirer, nagduda ang CPP nga nipagawas ang US ug travel advisory sa mga US citizens nga di pabisitahon sa Cebu ug Bohol tungod sa terror threat duha ka adlaw sa wa pa ang maong hitabo.
Matod pa sa CPP, susama kini sa mga minugna nga estorya sa US Central Intelligence Agency ug sa ilang mga kaonkunsabo sud sa hugpong military sa Pilipinas. Matod pa sa CPP, ang Abu Sayyaf dugay na nga nakigkunsabo sa Armed Forces of the Philippines ug sa US military.
Gani matod pa sa komunistang pundok, ang Abu Sayyaf gihulma sa armadong pundok nga gi- recruit sa US military aron mokuyog sa Taliban group.
Ang Taliban kaniadto gigamit sa CIA sa paglusad og usa ka “jihad” aron paglumpag sa gobyerno sa Afghanistan nga gipaluyohan sa Russia.
Matod pa sa CPP, ang pagsud sa Abu Sayyaf sa Inabanga, Bohol maoy gamiton sa US military aron makabutang silag puwersa sa Kabisay-an. Mao kini ang gikabalak-an sa CPP.
Laing gikabalak-an sa CPP mao ang pagpamomba sa Philippine Air Force did to sa Barangay Napo, Calenti ug Banahao sa Inabanga, Bohol. Matod pa sa CPP, siyam ka mga bomba ang gihug sa Philippine Air Force.
Makapangutana kita, nganong ang CPP man ang mabalaka nga ang mga sakop Abu Sayyaf man ang gibombahan?
Pero nganong nakasud man ang Abu Sayyaf sa Inabanga, Bohol? Klarong hinungdan mao nga way nagbantay sa atong kadagatan. Way nagbanatay sa Inabanga River.
Mao kana nga gisayon-sayon lang sa Abu Sayyaf sa pagsud sa maong dapit bisan way nangimbitar.
Ang akong mga higalang Bol-anon niingon nga tingalig manista lang ang mga sakop sa Abu Sayyaf didto sa Inabanga. Pero sayo pa kaayo kay magsugod pa man sa Mayo uno ang mga pista sa Bohol.
Apan duna diay taga Inabanga, Bohol nga kaila ang mga sakop sa Abu Sayyaf. Mao kini siya si Joselito Melloria, nga gideklarar na sa kapulisan nga usa “person of interest.”
Si Melloria diay maoy nagdala sa mga sakop sa Abu Sayyaf Group didto sa Sitio Ilaya, Barangay Napo, Inabanga. Nakaila niya kay nakapangasawa siya didto sa Manila og babaye nga anak og kanhi kumander sa Moro National Liberation Front (MNLF) nga taga Zamboanga City.
Di haka moingon ang CPP nga si Melloria ahente sa CIA?