Celebrities sa 2017 Kadaugan sa Mactan
Sa tinuig nga Kadaugan sa Mactan karong Abril 27, kansang re-enactment ipahigayon sa baybayon sa Liberty Shrine, barangay Mactan, Lapu-Lapu sa 9:30 sa buntag. Ang city tourism officer Hembler Mendoza mipahibawo na sa mga actor nga modala sa papel sa ‘Battle of Mactan’.
Duha ka mga nahimong contestant sa ‘Pinoy Boyband Superstar’ sa ABS-CBN ug Kapuso actress maoy molangkob sa main character sama nila ni Datu Lapu-Lapu, Reyna Bulakna ug Ferdinand Magellan nga ubos sa direksiyon ni Jonjit Primor.
Ang Fil-Am nga si Tony Labrusca, 21 nga anak sa actor nga si Anthony ‘Boom’ Labrusca maoy modala sa papel sa labing unang bayani sa nasud, Datu Lapu-Lapu.
Magsilbing partner sa McDonalds commercial model mao ang Kapuso star nga si Kris Bernal, 27 isip Reyna Bulakna
Sa karakter ni Ferdinand Magellan pagadumalahon sa mistiso nga aspiring singer James Ryan Cesena, 17.
Sila si Labrusca ug Cesena pulos nahimong contestant sa reality talent search sa Dos nga ‘Pinoy Boyband Superstar’.
Gibutyag ni Mendoza nga nakahan-ay na ang nagkadaiyang kalihokan sa kasaulogan sa ika-496th Kadaugan sa Mactan nga opisyal nga buksan karong Abril 17 sa Food Festival nga ipahigayon sa Liberty Shrine nga adunay nagkadaiyang nightly shows.
Samtang si acting Vice Mayor Harry Radaza mibutyag nga adunay 16 ka mga dancing contingent nga mosalmot sa Kadaugan Street Party o Rampada diin moabot sa gibana-bana nga P4 milyones ang budget alang sa maong kalihokan kansang final showdown ipahigayon sa Hoopsdome nga himuon sa Abril 28.
Subling gipahibawo ni Radaza nga niining ika-pito n aka tuig nga street party way kalsada sa Lapu-Lapu ang sirhan sanglit ang mga kalihokan concentrated nalang sa city hall grounds ug Hoopsdome, barangay Gun-ob area.
Kini gumikan sa security reasons ingon man ang nagkahuot na nga trapiko sa dakbayan diin daghang motorist ang mapagan.