Easter Sunday
True love ang gibati ko ngadto kang Gerald. Apan si Shieryl, nga
cousin ko man unta, nakahimo pa sa pagtraydor nako. Siya pa kunohay ang
bearer ni Gerald para nako. Sus, sekreto diay og labok ang kanahan. Hilom diay siyang nakagusto kang Gerald. Unsa kahay gisulti ni Shieryl kang Gerald nga napunta man ang gugma ni Gerald ngadto niya?
Ah, haguka ang gugma ni Gerald nako. Kon tinud-anay pa ang iyang love nako, magpabilin unta siyang magmahal nako?
Nahiabot ang pari ug gisugdan ang Santos nga Misa para sa Sugat. Nahilom pagkalit ang mga tawo nga kaganina langas nga nag-estoryahay. Mihuros ang bugnaw nga hangin. Nakapangiyugpos ko. Wa na ko motan-aw kanila ni Gerald ug Shieryl. Didto na ko magtan-aw sa pari. Naminaw ko niya.
Pagkahuman sa Misa, alegre kaayo ang mga tawo. Malipayon sila nga nabanhaw na si Kristo. Mitan-aw ko sa nahimutangan nila ni Gerald ug Shieryl. Wa na sila didto. Gialsa ko ang lingkoranan nga akong dala ug mibiya na ko sa church plaza. Dugay-dugay kong nakakanaog sa ubos kay nagpunsisok man ang mga tawo sa hagdan aron sa pagkanaog. Nahimutang sa bungtod nga lugar ang simbahan. Over looking ang ubos. Makita ang highway, ang complex, ang merkado ug ang dagat.
Wa dayon ko modiretso sa pagpauli sa balay sa akong mga apohan nga walking distance lang gikan sa simbahan. Miadto ko sa seawall duol sa merkado. Milingkod ko sa sementong lingkoranan ug nag-atubang ko sa lawod. Sayo pa kaayo ang kabuntagon. Nahanggap ko ang kapresko ug kabugnaw sa hangin nga gikan sa lawod. Di parehas sa hangin sa siyudad nga polluted na. “Mercy!” Nakalngi ko. Si Gerald diay ang nagsangpit nako. Nagtindog siya sa akong luyo. Mitindog ko aron sa pagbiya kang Gerald. Wa ko siya tagda kay di ko gustong makig-estorya niya. Apan iyang gikuptan ang usa ko ka bukton. Giwakli kog kusog ang iyang kamot.
“Unsa ba, Gerald? Mangupot ka man?” Nataas ang akong tingog. “Makita ka ni Shieryl!” Nagkusmod ko.
“Please, Mercy, mag-estorya ta.”
“Unsa pa may atong estoryahan? Wa na kay bili nako, uy!” Gusto kong mohilak apan nagpugong ko sa akong kaugalingon. Para sa unsa pa nga mohilak ko? (SUMPAYAN)