KING ARTHUR NIABOT NA SA UK, MASALIGON
Naabot na si ALA fighter “King” Arthur Villanueva sa United Kingdom bitbit ang dakong pagsalig nga molampos siya sa usa ka dakong tahas.
Si Villanueva gikatakdang makigbatok kang African Zolani “Last Born” Tete karong Abril 22 sa Manchester, UK alang sa inilugay sa World Boxing Organization (WBO) bantamweight eliminator. “Tan-aw nako, naa sad ko chance ni Tete. Salig sad ko sa ako training ug daku kaayo akong pagsalig nga modaog aning duwaa,” Facebook message ni Villanueva ning mantalaan sa iyang paghiabot sa UK. Nagkanayon si Villanueva nga wala ra siya gibati og pressure nga mosagubang na sab siya og dakong tahas sa gawas sa Pilipinas.
“Okey ra ang akong feeling karon, mura’g normal ra kay nakatulog man sab ko’g maayo sa biyahe. Grabe hinuon katugnaw diri, pero okey ra ni,” dugang ni Villanueva.
Importante kining awaya alang kang Villanueva kay mao kini ang agianan aron makapanuktok siya og balik alang sa world title.
Sa premiro niyang pagpanuktok alang sa world title, napakyas si Villanueva batok kang McJoe Arroyo niadtong Hulyo, 2015 sa Texas, USA.
Human niini, nibangon si Villanueva ug niposte’g tulo ka sunodsunod nga kadaugan batok sa Mexicans nga sila si Victor Mendez ug Juan Jimenez.
Kaduha sila nag-away ni Jimenez. Si Villanueva naghupot og 30-1, 16KOs nga rekord samtang si Tete adunay 24-3, 20KOs nga baraha.