Pacquiao posibling mapildi ni Horn: Bob Arum

Wala isalikway ni Top Rank boss Bob Arum ang posibilidad nga makamugna og surpresang kadaugan si Australian Jeff Horn sa pagpakigbatok niini kang Filipino

boxing icon Manny Pacquiao karong Hulyo 2 sa 50,000

capacity Suncorp Stadium sa Brisbane, Australia.

Bisan sa impresibo niyang 16-0-1, 11 KOs nga rekord, si Horn gikonsiderar gihapon nga dakong underdog sa iyang pagsuway og ilog sa World Boxing Organization (WBO)

welterweight title ni Pacquiao. Apan gipahimangnuan ni Arum ang Pambansang Kamao sa Pilipinas nga dili molugak bisan gamay hilabi na kay moaway kini sulod sa balwarte ni Horn.

“If his fight with Pacquiao was in (Las) Vegas or Madison Square Garden in New York, I wouldn’t give him (Horn) much of a chance, because I think

nerves would take over against a fighter like Manny,” pasabot ni Arum sa interbyu sa The Courier Mail.

“But the fact that Jeff is going to be fighting in front of so many of his countrymen will calm his nerves, and I think he will give a great account of himself.”

Sa taas niyang kasinatian isip promoter, labing seguro nakita na ni Arum ang tanang posibilidad kon boksing ang hisgutan hinungdan nga dili angayang ibaliwala ni Pacquiao ang gipanulti niini. “Manny is a big favorite,” matod ni Arum. “But in boxing, anything can happen, and I have seen a lot of big upsets in my time.”

Nagtuo si Arum nga magdasok ang Australian fans sa Suncorp aron moabiba kang Horn.

“I watched Horn’s last fight ringside in New Zealand and he’s a very capable young man,” pasabot ni Arum.