Warriors-Blazers playoffs sugdan na

Sugdan sa Golden State Warriors ang ilang kampanya sa playoffs sa National Basketball Association (NBA) bitbit ang determinasyon nga makabawi gikan sa makapakaging nilang kapakyasan sa finals sa miaging tuig batok sa Cleveland Cavaliers.

Niadtong higayuna, ang Warriors nakaposte og 3-1 nga bintaha sa series apan sa wala damha, gisagunsonan sila og pilde sa Cavaliers sa nagsunod tulo ka mga duwa nga maoy nakapahugno sa ilang kalibutan.

Bisan ning maong kasinatian, ang Warriors nagpabiling dako og pagsalig nga mabawi nila ang korona hilabi na nga ilaha na’ng kauban si Kevin Durant ning higayuna.

Karong adlawa sugdan sa No. 1 overall Warriors ang ilang kampanya sa playoffs pinaagi sa pagpakigbatok sa Western Conference No.8 Portland Trail Blazers. “For the Warriors, it’s obviously championship or bust,” batbat ni Turner Sports analyst Reggie Miller, kinsa usa ka Hall of Famer .

“You don’t go out and get Kevin Durant and be happy to get to the Conference Finals or

the NBA Finals and lose. They have to win a championships. Period.”

Sa miaging tuig, grabe na kalig-on ang puwersa sa Warriors ug timailhan lang niini ang ilang pagbuak sa dugay na’ng rekord sa Chicago Bulls pinaagi sa pagposte og 73-9 nga rekord sa regular season.

Magsugod sab karong adlawa ang 1st round series tali sa Atlanta Hawks batok Washington Wizards, Chicago Bulls batok Boston Celtics ug Oklahoma City Thunder batok Houston Rockets.