NAKA-ESKAPO
Nakaipsot ang host Cleveland Cavaliers sa grabeng pagpanghudlat sa Indiana Pacers aron iposte ang kulbahinam nga 109-108 nga kadaugan kagahapon sa pagsugod sa ilang Eastern Conference 1st round playoffs series sa National Basketball Association (NBA).
Ang East No. 2 Cavaliers, nga gikan sa upat ka sunodsunod nga pilde sa tumoy nga bahin sa regular season, gipangulohan ni LeBron James pinaagi sa iyang 32 puntos, nidugang og 23 puntos si Kyrie Irving samtang nitampo og 17 puntos si Kevin Love.
Ang tanang paningkamot sa Big Three sa Cavaliers diriyot mausik ug maayo na lang kay wala nasulod ang 14-foot
jumper buzzer-beater ni CJ Miles nga mao unta’y makapadaog sa East No. 7 Pacers.
Kon nasulod pa ni Miles ang katapusan niyang itsa, gituohang mosamot unta ka hugno ang moral sa defending champion Cavaliers, nga padayong naglibog sa angayan nilang buhaton alang sa tinguha nilang depensaan ang korona.
Apan alang kang James, dili kini angayan nilang hunahuna ug ang importante nakuha nila ang kadaugan.
“He missed. We won,” matod
ni James kabahin sa itsa ni Miles.
Human nasipyat si Miles, nagkanayon ang kauban niyang pambato nga si Paul George nga kinahanglan siya maoy tahasan sa katapusang itsa alang sa Pacers.
“I talked to CJ about it,” asoy ni George. “In situations like that, I gotta get the last shot. CJ took it upon himself. I’m confident with all of my guys taking shots. That’s not the issue. In that situation, I need the ball.”
Gipangulohan ni George ang Pacers pinaagi sa iyang 29 puntos, nihatag og 16 puntos si Lance Stephenson samtang nitunol og 15 puntos si Jeff Teague. Si Miles igo lang niamot og lima ka puntos.
Gipasabot ni Miles nga tinguha unta nilang ihatag ang bola ngadto kang George apan sa wala tuyoa, siya maoy nakadawat sa bola hinungdan nga naahat siya pag-itsa niini.
“Obviously, we wanted to get the ball to Paul to be able to get the shot to win the game,” batbat ni Miles. “I got the ball at four ( seconds), so I had to take it myself. I got a good shot. I just didn’t make it.” Sa laing series sa East, gipakaging sa No. 6 Milwaukee Bucks ang No.3 host Toronto Raptors, 97-83. Samtang sa Western Conference, gipakuratan sab sa No. 5 Utah Jazz ang No. 4 host Los Angeles Clippers, 97-95, samtang gipangkusokuso sa No. 2 San Antonio Spurs ang Memphis Grizzlies, 111-82.