Travel advisory sa SKorea di makaapekto

Gipadayag ni Acting Mayor Edgardo Labella nga di maapektuhan ang ekonomiya sa turismo sa dakbayan sa Sugbo human miisyo og travel advisory ang South Korea batok sa Bohol gumikan sa hulga sa seguridad.

Ang mga Koreano gikan sa South Korea maoy labing daghan sa mga turista mga magbisitahan sa Pilipinas ug ang Sugbo maoy usa sa ilang labing paborito nga destinasyon lakip na ang Bohol.

Si Labella niingon nga padayon gihapon nga modagsa ang mga Koreano dinhi sa Sugbo sanglit hugot ang seguridad sa dakbayan ug wa usab kini maapil sa travel ban.

Ang travel advisory nga giisyo sa Foreign Ministry sa South Korea niisyu niini human sa nahitabong engkwentro tali sa tropa sa gobiyerno ug Abu Sayyaf diin upat ang nakalas sa awtoridad ug unom sa habig sa bandidong grupo.

Si Mayor Tomas Osmeña sa iyang bahin una rang niingon nga ang mga Koreano di maapektuhan sanglit mga isog sila og dugo ug di mahadlok.

Matod pa sa ilang foreign ministry nga bisan paman kon human na ang gubat, aduna gihapoy pabilin nga hulga sanglit wa nahurot og kamatay ang mga sakop sa Abu Sayyaf.

Si Konsehal Dave Tumulak, deputy mayor for police matters, nagkanayon nga adunay basehan ang ilang travel advisory sanglit adunay mga miyembro sa Abu Sayyaf nga naka-eskapo ug hangtod karon wa pa sila masayod kon asa kini nagtago-tago.

Sa pagkakaron, padayon nga alerto ang Armed Forces of the Philippines ug naniid kon asang dapita sa rehiyon nitago ang mga nakaeskapo sa tinguha nga di na sila makahatag og dugang kasamok.

Ang mga Abu Sayyaf nipunterya sa Bohol ug gikataho nga mohimo kinig pagpangidnap ilabi na ngadto sa mga langyaw ug ipalukat og minilyon sanglit ang Bohol gilangkuban og mga maanindot nga beach.