KANDINGMILUWAS OG MGA KINABUHI
Superhero?
Mao kini ang kasagarang tawag sa mga tawo nga nakatabang sa uban o nakasalbar og usa ka kinabuhi.
Apan di tawo kundi usa ka kanding ang nahimong ‘'true lifesaver'' sa usa ka pamilya didto sa Weiner, Arkansas.
Sa taho sa Huffington Post nga ang 10 anyos nga si Abigail Bruce nakadawat og usa ka binuhing kanding sa iyang adlawng natawhan unya gihiganlan kini niyag ‘’Speedy’’ ug kini nga klase sa mananap ang nakasalbar sa iyang tibuok pamilya.
Usa ka gabii diin natug na si Abigail kuyog iyang binuhi nga si Speedy dihang gikalitan siyag pukaw sa mananap pinaagi sa pag-ambak niini sa iyang paa ug dughan.
Nahibung si Abigail ug sa iyang pagmata, nakita niya ang grabeng aso sa iyang bay busa dali-dali siya nga nidagan sa kwarto sa iyang ginikanan.
“She said it was smoky and she could hardly breathe.” matod ni Nick Bruce, amahan ni Abigail nga nahinabi sa KAIT TV.
Midugang si Nick nga abi niya og dunay naghaling sa gawas sa ilang balay apan sa iyang pagsusi ang kayo nakit-an niyang nikatay na sa gawas sa ilang bintana.
Naugdaw sa kayo ang grahe ug dali-dali silang niambak sa bintana sa ilang kwarto paingon sa ilang tugkaran.
Pipila ka minutos ang nakalabay miabot ang kabomberohan ug gumikan sa aso mihatag kinig kadaot sa tanang butang sa ilang balay.
Gitumbok sa mga imbestigador nga electrical problem ang hinungdan sa sunog.
Matod ni Abigail nga ang kanding maoy maanindot nga gasa sa iyang adlawng natawhan.
“I'm glad we got it before the fire happened or we wouldn't be here,” saysay niya.