Easter Sunday
Samtang naglakaw ko sa pagpauli, nahunahuna ko ang gisulti ni Gerald. Ning adlawa karon nga Easter Sunday, nga mao ang pagkabanhaw ni Krito, nabanhaw sab ang pagpangulitawo ni Gerald nako. Nakita ko nga seryuso gyud siya sa iyang pagpadayag sa iyang gugma nako. Nahunahuna ko sab ang ilang sitwasyon ni Shieryl. Si Shieryl lang diay ang nagtuo nga managhigugmaay sila.
Kon tinuod sab nga dunay sakit sa kasingkasing si Shieryl, aw, may rason man sab si Gerald nga di niya kini hatagan og kaguol kay basig siya ang mahimong hinungdan nga mamatay kini. Nakaginhawa kog lawom. Inanay nga nawala ang kalagot ko kang Gerald. Nahunahuna ko nga gisakripisyo niya ang iyang gugma nako.
Ah, binuang! Nagyawyaw ko sa hilom. Di ko angay hatagan og pagtagad ang gipanulti ni Gerald nako, kay kon tinuod pa gyud ko niyang gimahal, di siya maghunahuna sa sakit ni Shieryl. Mao gyuy hatagan niyag dakong pagtagad ang iyang love nako. So, di ko angay motuo kang Gerld nga gihigugma gyud ko niya.
Nuon, nakuhaan gyud ang akong kasuko niya. Apan nagpabilin ang kalagot ko kang Shieryl. Para nako, traydor gyud siya. Nganong gipatuo niya si Gerald nga wa kini paglaom sa iyang gugma nako nga di man kini tinuod? Hangtod karon, si Gerald pa gihapon ang gipitik sa akong kasingkasing. Daghan ang mga nangulitawo nako sa eskuwelahan. Apan wa koy pagbati nila bisag usa man lang kanila.
Miamen ko sa akong Lolo ug Lola pag-abot ko na sa balay. Nanimba sab sila sa Misa sa Easter ganinang kadlawon. Human ko makailis ug para sa balay, migawas ko sa akong kuwarto ug namahaw ko. Gamay ra ang akong gikaon kay wa koy gana. Nahasol ko karon. Kon wa pa lang diay ko traydora ni Shieryl, boyfriend ko na diay unta si Gerald?
Kamalipayon ko kaha karon?
Kay init man ang panahon, nagpahayahay ko sa lawn. Dunay dakong lagwerta ang balay sa akong mga apohan. Duna kini mga tanom nga mansinitas, may tanom sab nga Persian mango. Nakatabang kini sa paghatag og landong sa lawn. Bugnaw ang maong lugar tungod sa maong mga kahoy.
Unya, nahiabot si Shieryl. Nagkusmod kong miatubang niya.