Love is nothing without you
Dihang milarga na paingon sa Manila si Ariel, mikuyog gyud ko sa iyang Mama sa paghatod niya sa piyer. Nagbarko lang ang akong boyfriend. Naghilak gyud ko. Ug sa unang higayon, nakita ko si Ariel nga naghilak. Klaro nga gisakitan sab siya sa among panaglagyo.
“Basta kita lang gyud, ha?” Hugot kong migakos kang Ariel sa dayon na niyang sakay sa barko.
“Oo, Nikki. Ayaw gyud pangitag laing laki, ha?”
Namahid ko sa akong mga luha dayon kong tando.
“Ikaw sab didto, ha, Ariel? Pagbinuotan gyud didto.”
Sakit man tuod para nako ang pagbiya ni Ariel, apan kinahanglang dawaton ko ang reyalidad nga ang tuyo sa akong boyfriend mao ang pagtuman sa iyang pangan- doy. Usa ka adlaw pa lang gani nga nahilayo siya nako, gibati ko na ang kamingaw niya. Kanunay ming nagtawganay sa selpon. Nagteksanay sab mi ug gibalik-balik namo ang among gipanumpaan nga kami ra gyud ang magminahalay.
Usa ka hapon ana, nakalitan ko sa pagbutho ni Grace sa among balay. Namubo ko sa akong mga tanom nga rosas ug orchids sa among hardin. Ako gyud ang nangunay sa pag-atiman ani kay hilig man kog mga buwak. Malipayon kaayo ang akong amiga. Dugay-dugay na ming wa magkita kay busy man siya kanunay sa praktis. Star player si Grace sa among varsity team sa volleyball. Usa ra ka university ang among gitunghaan.
“Natuman gyud ang akong pangandoy, Nikki. Gikuha ko sa gipangandoy kong university sa Manila.” Naitsa ko ang hose nga gigamit ko sa pagbisibis sa akong mga tanom sa hardin kay basig mabasa si Grace. Gigakos man gud ko niya. Nasabtan ko nga malipayon gyud kaayo siya.
“Congratulations, Grace. Mosikat gyud ka sa volleyball.” Nahimong star player sa varsity team sa volleyball si Grace tungod sa kamaayo niyang moduwa. Dako ang akong pagtuo nga madugangan pa ang iyang nakamahoan sa maong sports kon tua na siya sa inilang university sa Manila mag-eskuwela.
Unya nahisgotan niya si Ariel. Ako ang nagpaila-ila sa akong boyfriend ngadto kang Grace. Gisultihan ko si Grace nga tua na sab sa Manila si Ariel, kay adto na motiwas sa pag- eskuwela sa kursong Accountancy. (SUMPAYAN)