LOLA, APO NAPAIG SA SUNOG

WA MAKAGAWAS SA 2ND FLOOR SA BALAY SA LAPU-LAPU

■ NATANGGONG. Gisusi sa mga imbestigador ang lawas ni Jane Ycong, 14, nga usa sa namatay sa sunog kagahapon sa dakbayan sa Lapu-Lapu- Si Jane nga usa ka special child ug ang iyang apohan nga si Aurea Jumao-as, 85, wa makagawas sa ilang balay atol sa sunog.

Lola ug iyang apo nga usa ka

special child nangapaig atol sa ikaduhang sunog sa Purok Kapayas, Barangay Canjulao, Lapu-Lapu City pasado alas 2 kagahapon sa hapon.

Duha ka managlahing mga sunog ang ning-igo sa dakbayan sa Lapu-Lapu kagahapong adlawa taliwa sa grabeng kainit sa panahon.

Tungod sa kainit, naandan ang paggamit sa appliances sama sa aircon ug electric fan nga kuyaw nga mo- overheat kon mapasagdan ug moresulta sa sunog.

Ang unang alarma nahitabo sa Sangi New Road, barangay Pajo nga nakamugna og kadaot sa usa ka balay gumikan sa nag-leak nga liquefied petroleum gas (LPG) tank.

Samtang 16 ka mga balay ang gilamoy sa kayo sa barangay Canjulao base inisyal nga taho sa kabomberohan sa ikaduhang sunog kagahapon sa hapon.

Atol sa pagsuwat, nagpadayon pa ang ilang imbestigasyon.

Pwerting tiyabaw sa mga kabanay sa dihang nasayod nga wa makagawas ang mga biktima nga sila si Aurea Jumao-as, 85 ug iyang apo nga si Jane Ycong, 14, sa ilang balay.

Saysay ni Edna Ycong, 48, inahan ni Jane ug anak ni Aurea, nga wa na niya maluwas ang iyang anak ug mama tungod sa dakong dilaab sa kayo.

Ang duha didto pa sa ikaduhang andana sa ilang balay.

Lawas ni Aurea diha na mapalgi sa terrace samtang si Jane didto sa iyang lawak. Kini pulos nahimutang sa second floor sa ilang konkreto nga balay.

Asoy sa silingan nga wa magpaila nga nagsugod sa balay sa mga Ycong ang kayo gumikan niadtong giingong pagspark sa linya sa kuryente.

Dali nga nikaylap ang kayo sa tupad nga kabalayan.

Mga bombero naglisod sa pagkumbati sa sunog kay gawas nga sudlonon, dili gilayon sila makapabuga og tubig gumikan sa live wire nga nagsige og spark.

Sila nabalaka nga makuyentihan hinungdan nga gipaabot ang linemen sa Mactan Electric Company (MECO) aron sa pagpawong sa kuryente sa maong dapit.

Sigun ni SFO2 Hadji Luden, nga 2:17 pm nakapadagan sila sa ilang firetrucks paingon sa dapit ug sud sa walo ka oras nakontrolar ang kayo.

Sa laing bahin, mokabat sa P100,000 ang danyos sa pagkasunog sa balay ni Glen Abad kagahapon sa 8:51 sa buntag sa Sangi New Road, barangay Pajo sa dihang ang bag-ong gipa-refill nga LPG tank ang matod pa nag-leak.