Love is nothing without you
Silingan ra mi si Ariel. Kanunay ming magkita since sa among pagka bata. Mao bitaw nga nagkasuod mi hangtod nga nagkahinigugmaay usa ra sab ka eskuwelahan ang among gitunghaan gikan sa elementary hangtod sa among paghayskol apan sa pagtungha namo sa college, lain- lain ang university nga gikuhaan namog kurso.
Usa ka gabii nga namisita si Ariel nako, nahiabot sab si Grace kay duna siyay tuyo nako. Mao nga gipaila ko sa usag usa sila si Ariel ug si Grace.
“Tinuod ka, Nikki? Adto na mopadayog eskuwela si Ariel sa Manila?” “O lagi.” Unya gisultihan ko siya sa tanan kon nganong mibiya ang akong boyfriend sa Cebu.
“Maayo nuon, Nikki, kay duna na koy friend dayon sa Manila. Tagai ko sa iyang cellphone number aron tawgan ko siya.” “Ay, oo, uy.” Wa ko maghunahuna og bisan unsa bahin sa giingon ni Grace. Gani, nalipay man ko kay di laayan si Ariel sa Manila kay adto na man sab didto si Grace.
“Kon makapaniid gani kang dunay laing girl nga gikabuangan si Ariel didto, pahibaw-a dayon ko, ha, Grace?”
“Sure kaayo, Nikki. Di siya magsilbi nako. Akoy iyang kontra kon magluib siya nimo.”
Nakig-aper si Grace nako. Unya malipayon pa ming nag-estoryahay. Bisan unsa na lay among gipanagsultihan. Gabii na nga mipauli si Grace.
Nanglabay pa ang mga adlaw. Kanunay ang maayo namong communication ni Ariel.
“Ikaw ang akong inspirasyon, Nikki, sa akong pagpaningkamot sa paglampos sa akong pangandoy.”
“Mao sab ko, Ariel. Sa adlawng tanan sa eskuwelahan, ikaw ang akong gihunahuna kanunay.”
Usa ka gabii ana dugay ming nangatulog si Ariel kay gitawgan ko niya sa selpon. Naghigda ko sa sulod sa akong kuwarto niadtong tungora. Mingaw na ang sulod sa among balay kay nangatulog na tingali ang akong mga ginikanan ug duha ka mga igsuon.
“Basta, lig-unon lang gyud nato kanunay ang atong love sa usag usa, Ariel, bisag nagkalagyo ta.”
Dasig kaayo ko. Morag naa lang sa akong atubangan ang akong boyfriend.
“Oo, Nikki. Di ta magpada’a sa mga tentasyon.”
Nagpahiyom kong nakatulog niadtong gabhiona. Misalig ko kang Ariel. Di gyud ko niya ilisan og laing babaye. ( SUMPAYAN)