BRGY. KAPITAN GIPUSIL, PATAY
QUISUMBING MITANYAG OG P200 MIL NGA GANTI SA MAKATUDLO SA MIPATAY SA KAPITAN SA MANTUYONG
Barangay kapitan sa Mantuyong, dakbayan sa Mandaue Antonio Maquilan gipusil sa nag- back ride sa motorsiklo nga mamumuno samtang nangabli sa gipanag-iya nga kan-anan ang biktima sa dalan B. Ceniza, sa maong barangay kagahapon sa kaadlawon.
Kagamhanan sa dakbayan sa Mandaue mitanyag og reward money alang niadtong makatudlo ug pag-ila sa mamumuno ni Maquilan. Si Maquilan, kinsa naka- wheel chair tungod kay napungkol ang tuo nga paa gumikan sa sakit nga diabetes ang naka-angkon og samad pinusilan sa iyang wala ug luyo nga bahin sa paa, samtang suway nga mipatunga ang iyang igsuon sa dihang nagtion ang gunman ngadto ni Maquilan.
Dead-on-arrival (DOA) si Maquilan sa dihang gidala sa pribadong ospital gumikan sa atake sa kasingkasing tungod sab sa trauma sa nahitabo.
Na- stroke sa miaging tuig ang 56 anyos nga barangay kapitan ug nag-antos sa nagkadaiyang sakit.
P200,000
Si Mandaue City Mayor Luigi Quisumbing mitanyag og P200,000 niadtong maka-ila ug makatudlo sa mamumuno nga mipusil ni Maquilan.
Ang gunman nga backrider ang nagsul-ob og full-face helmet lakip na ang drayber sa motorsiklo atol sa papamusil.
Hulga
Gitug-an sab sa mayor atol sa gipatawag nga press conference kagahapon nga nakadawat og pagpanghulga sa iyang kinabuhi si Maquilan nga gipaagi sa text messages ug tawag sa iyang cellphone.
Ang caller giingong nangilkil sa dihang mandoan si Maquilan sa pagpadala sa kuwarta pinaagi sa money transfer, apan wa hatagi og pagtagad sa opisyal ang maong extortion.
Naglisod sa pagsubay ang mga pulis sa death threat diha sa cellphone ni Maquilan sanglit gipang- delete gilayon ang mga mensahe.
Samtang si PSSupt. Roberto Alanas, hepe sa Mandaue City Police Office mipahibawo nga nagtukod sila og Task Group Maquilan nga maoy magtutok sa maong kaso.
Gidudahan nga ang adunay nagdumot o karibal sa negosyo ang nagpaluyo sa pagpamusil, nasayran nga si Maquilan nagdumala og piggery.