Lonely heart
Dugay kong nakatulog nianang gabhiona. Nagkalandrakas ang sulod sa akong hunahuna. Mahunahuna ko si Junry, ang iyang gugma nako ug kon nganong wa pa ko batiag gugma niya nga faithful man unta siya sa iyang tinguha nako, ug di sab siya lisod mahalon kay buotan ug gikan sa maayong pamilya. Mahunahuna ko sab si Sam nga giseryuso gyud pag-ayo ang pagbiya sa iyang inahan kaniya ug sa iyang Papa Eduardo. Unya mahunahuna ko sab si Nang Amelia nga basta-basta lang nagluib kang Noy Eduardo. Ug mahunahuna ko sab si Noy Eduardo nga naapektohan sab gyud pag-ayo sa kaguol.
Aw, kinsa man say di maguol ug mauwaw sa gibuhat ni Nang Amelia? Bation gyud kini ni Sam isip anak, ug bation sab ni Noy Eduardo isip bana. Maayo gyung pagkaguba sa ilang pamilya. Ngano ba sab si Nang Amelia, uy, nga wa man hunahunaa pag-ayo ang mahimong dakong epekto sa iyang gibuhat?
Hilom kong naglagot sa akong kaugalingon. Ngano ba nga hasulon ko man ang akong hunahuna kanila? Mitakilid ko sa paghigda. Gusto na kong matulog. Di ko angay nga maghunahuna sa pagkabungkag sa pamilya nila ni Sam. Wa koy labot nila, uy! Nagbagutbot ko. Milabay pa ang mga adlaw.
As usual sigeng pamisita si Junry nako. Ug sa gihapon, wa ko siya sugta, ug wa sab nako siya balibari. Ambot ba sab, uy, nga mahimo ko na man unta siyang sugton ug maghuwat na lang ko nga higugmaon ko siya? Apan di kini angay kong buhaton. Makigrelasyon kog lalaki nga wa ko makaseguro kon gimahal ko ba siya? Na, maparehas unya ko kang Nang Amelia nga maluibon? Aw, wa gyud tingali love si Nang Amelia kang Noy Eduardo kay giyano man lang niya kinig traydor?
Usa ka adlaw ana nga misuroy ko sa downtown, nagpalit kog blouse sa Metro, nakita ko si Nang Amelia nga naglakaw sa sidewalk. Unya misulod siya sa Jollibee. Nadiyong ang akong mga mata nga misunod pagtan-aw niya. Niwang siya, uy. Midaot siya! Ug nganong nia man siya sa Cebu nga mikuyog man unta siya sa iyang kanhi boyfriend sa Negros?
Nahibulong gyud ko. Nakahunahuna ko sa pagsunod niya.