Import misalbar sa Gins vs. Alaska

Gisalbar ni Justin Brownlee ang Barangay Ginebra pinaagi sa pagkompleto sa iyang three-point play sa himatyong segundos aron kuliton ang 103-102 nga kadaugan batok sa Alaska Aces niadtong Dominggo sa 2017 PBA Commissioner’s Cup sa Araneta Coliseum.

Ang Kings naglabaw og kapin sa 10 puntos sa third quarter ug hinayhinay kining napapas hangtod nga nabiyaan sila og sais puntos sa katapusang tres minutos.

Apan ang lay-up ni Joe Devance ug ang tres ni Kevin Ferrer maoy nakapasikit, 100-101, sa nahabiling 2:13 segundos.

Nidag-om na unta ang kahigayonan sa Kings sa dihang si Chris Banchero nakakuha og foul nga maoy naghatod kaniya sa free throw line. Apan ang ikaduhang free

throw mao ray napasulod ni Banchero, 100-102. Ang nahabilin nga 19 segundos sa duwa igo ra kaayo nga makapahimong bayani ni Brownlee kinsa mi- lay-up atubangan sa import sa Alaska nga si Cory Jefferson ug sa samang higayon nakakuha og foul. Iyang nakompleto ang threepoint play sa katapusang 7.2 segundos. Duha ka higayon nga modaog pa unta ang Alaska apan pulos nasipyat sila si Jefferson ug JVee Casio sa ilang tagsatagsa ka mga itsa hangtod napupos ang oras.

Sa kadaugan, ang Ginebra misaka ngadto sa 5-1 nga baraha samtang ang Alaska nahagsa sa 4-3. Sa sayo pa, gipukan sa Mahindra Floodbusters ang Blackwater Elite, 96-87.

Ang bag-ong nakuha gikan sa trade nga sila si Glenn Khobuntin ug Eric Camson maoy nahimong lig-ong piyesa sa Floodbuster aron pakgangon ang ilang ikalima nga sunodsunod nga kapildihan. / JBM