Tubaga palihog Gen. Lactao
Lisod tuhoan nga ang usa ka dinakpan nga miyembro sa Abu Sayyaf, luyahon ug samaron unya nakaposas pa ang mga kamot, nga gikuyogan sa kapulisan padung sa prisohan sa BJMP, makaeskapo unya pagkataudtaod, patay na kay napusilan sa katulo ka higayon, sa tiil, sa aping ug agtang. Labi nang lisod tuhoan nga luyahon pa kay dugay nang way kaon, mokalit lang og dagan ang dinakpan nga Abu Sayyaf palayo unya makigsinumbagay sa kapulisan ug maoy hinungdan nga gipusil siya. Ug labi nang mas lisod tuhoan nga gipusil kay midagan tungod kay naa sa tunga sa agtang sa Abu Sayyaf ang bala maigo. Diha unta sa likod sa ulo ug di sa agtang maigo kon nagdagan pa.
Dunay laing panghitabo nga lisod sab tuhoan. Matod pa ni Maj. Gen. Oscar Lactao, commander sa AFP Central Command, gisugo siya ni President Rody Duterte nga maoy mohatag sa kwarta nga gigahin alang sa habal-habal driver nga maoy mitabang pagtaho aron madakpan ang upat ka mga Abu Sayyaf. Gihatag ang kwarta ngadto sa habal-habal driver talitapos sa Abril 2017. Apan dunay katingad-an. Wa mosulti si Gen. Lactao og pila ang gihatag nga kantidad ngadto sa driver kay matod pa niya, ang reward system classified information kuno. Dugang pa nga katingad-an kay wa pasudla ang mga miyembro sa Bohol media atol sa okasyon. nga gisaad? Misaad si PRRD og 1 ka milyon kada ulo sa Abu Sayyaf. Midugang si Cebu City Mayor Tom Osmena og laing P500,000 kada ulo ug dunay pay laing P100,000 kada ulo gikan sa lalawigan sa Bohol. Kon totalon kini, mokabat sa 6,400,000.00 ang madawat alang sa pagkadakop o pagkamatay sa 4 ka Abu Sayyaf.
Pila man ang nadawat sa habal-habal driver? Wala mosulti si Gen. Lactao og pila ang iyang gihatag kay matod pa niya, confidential information ang reward system sa military. Makalibog kining gihimo ni Gen. Lactao. Kay ngano man? Tungod kay ang impormante nga mitabang sa AFP didto sa Sulu sa miaging bulan nga maoy hinungdan sa pagkamatay ni Abu Sayyaf lider Alhabsy Misaya gihatagan og kwarta tungod sa iyang gihimo. Pila man ang nadawat? Mismo si Maj. Gen. Carlito Galvez, commander sa Western Mindanao Command mitaho nga mihatag sila sa kantidad nga P1 million ngadto sa impormante. Naunsa na man kini? Lahi ang gisulti ni Gen. Lactao sa gibuhat ni Gen. Galvez. Kon confidential information pa kini, sumala ni Gen. Lactao, nganong gitaho man ni Gen. Galvez ang kantidad nga nadawat sa inpormante? Palihog pasabta kuno ang lungsod, Gen. Lactao.