Lonely heart
Gisundan gyud nako si Nang Amelia. Nagdali kong misulod sa Jollibee. Nag-order siya og pagkaon sa counter. Nagpaniid lang ko. Unya human maka-order, milingkod si Nang Amelia sa lamesa simpig sa bungbong nga bildo. Mi-order kog hamburger ug juice.
“Can I join you?” Nagtindog ko sa atubangan ni Nang Amelia.
Sa nawong ni Nang Amelia, klaro nga nakugang siya pagkakita nako. Apan kadali ra. Gipahiyoman ko niya. “Sige, Letlet.” Milingkod ko sa bakanteng silya atbang ni Nang Amelia. Miinom siya sa iyang juice ug miduko. Morag wa makaharong sa pagtan-aw ko niyag dugay. Namiyahok gyud ang iyang aping. Ug miluspad. Midaot gyud siya apan nagpabilin ang iyang kaguwapa.
“Di ba didto ka man sa Negros, Nang?” Giunhan nako siyag pangutana.
Mitan-aw si Nang Amelia nako. Namuwa ang iyang mga mata. Klaro nga kahilakon.
“Gilayasan ko si Roman. Maldito diay siya. Kanunay ko niyang dapatan.”
Ning higayona, naghilak na gyud si Nang Amelia. Naghilom lang ko. Naghuwat ko sa dugang pa niyang isulti.
“I love him maong mikuyog ko niya. Gibiyaan ko sila si Eduardo ug si Sam tungod sa akong gugma niya. Pero nasayop ko. Nagbasol ko pagayo sa pagpasakit ko sa akong bana ug sa akong anak, Let.”
Nagpamahid si Nang Amelia sa iyang mga mata sa gikuptan niyang panyo.
“Dakog kadaot sa imong pamilya ang imong gibuhat, Nang.”
Unya gisaysay ko kang Amelia ang sitwasyon karon ni Sam ug ni Noy Eduardo. Mibakho si Nang Amelia. Nakita ko sa iyang hitsura nga tinud-anay ang iyang paghilak ug pagbasol.
“Madawat pa kaha ko nila, Let? Gusto kong matibuok pag-usab ang among pamilya.”
Miginhawa kog lawom. Gitutokan ko pag-ayo si Nang Amelia.
“I- try lang, Nang, kay basig mapasaylo ka pa nila.”
Nahilom si Nang Amelia. Nagpadayon siya paghilak. Ug nahunahuna ko nga ang gugma diay di pulos kalipay ang ikahatag. Tungod sa gugma ni Nang Amelia kang Noy Roman, gitalikdan niya ang iyang bana ug anak nga nagmahal kaniya. Misamot ang akong pagtuo nga di ko angay magdali-dali sa pagsulod sa seryusong relationship.. Angay nga klaruhon nako kon
love ba gyud nako ang lalaki nga himuon kong boyfriend, ug kanang gihigugma sab ko niya sa tinud-anay. (SUMPAYAN)