Lonely heart
Usa ka gabii, samtang nagtindog ko sa among terrace, nakita ko na sab si Sam nga naglingkod sa ilang terrace apan ning higayona, nagpakuting-kuting siya sa iyang sista. Mao kini ang gihimong kalingawan ni Sam kon naa siya sa ilang balkon panahon sa kagabhion. Apan nahunong kini dihang gibiyaan sila ni Nang Amelia. Maoy iyang kantahon ang masulub-on nga mga love song.
Apan karon, nia na sab siya, nagkanta sa usa ka magulanon nga awit. Usa ra ang timailhan ani. inanay na niyang nadawat ang pagkuyog
sa iyang inahan sa laing lalaki. Nag-atubang siya nako ug usahay motan-aw siya nako.
“Ikaw lamang ang aking iibigin…hanggang magpakailan man…,”
Kini ang paboritong kanta ni Sam. Natandog ko sa lyrics sa maong kanta. Unya kalit nga nahunong ang pagkanta ni Sam kay miduol niya si Noy Eduardo. Nag-estoryahay sila. Pagkataudtaod, misulod si Nang Amelia. Migakos si Nang Amelia kang Sam. Akong nasabtan nga naghilak si Nang Amelia. Nagpadayon siya paggakos kang Sam ug morag dunay gisulti.
Tingali, nangayo siyag pasaylo kang Sam.
Unya, migakos na si Sam kang Nang Amelia. Sa akong tan-aw sa duha, naghinilakay sila. Nagpamahid sab si Noy Eduardo sa iyang mg mata, klaro nga naghilak sab siya. Wa madugay, gigakos ni Noy Eduardo sila si Sam ug Nang Amelia.
Very dramatic ang esena. Morag kahilakon sab ko. Apan hilom kong nakapahiyom. Klaro nga natibuok pag-usab ang pamilya nila ni Sam kay sa akong pagsabot, gipasaylo nila ni Noy Eduardo si Nang Amelia ug kinasingkasing nga ila kining gidawat.
Namiya sa terrace silang tulo. Mibiya sab ko sa among
terrace ug midiretso ko pagsulod sa akong kuwarto kay katulgon na ko.
Pagka ugma, sayo pa gani ang kabuntagon mibangon na ko ug naligo. Init ang panahon bisag buntag pa. Pagkahuman kog kaligo ug nakailis na ko, nahibulong ko kay dunay gikaestorya sila si Mama ug Papa sa among sala. Pagsusi ko pa, si Sam diay. First time pa kini nga mianhi si Sam sa among balay.
“Letlet, nia si Sam. Ikaw ang iyang tuyo.”
Nagpahiyom si Mama nga mitan-aw nako. Miduol ko nila ug gibiyaan ming duha si Sam nilang Mama ug Papa.