Lonely heart

Sa unang higayon, nakita ko si Sam nga malipayon. Sayag ang iyang nawong. Nasabtan ko siya. Apan nagpakaaron-ingnon ko nga wa makahibawo sa iyang gibati ron. Nag-atbang mig lingkod sa sala.

“Kabuntag aron, uy. Gipakalitan gyud ko nimo sa imong pag-anhi ron. First time pa ni bisag silingan kaayo ta.”

Gipakita ko kang Sam nga malipayon sab ko. Di ko gusto nga magseryuso kay gusto kong moduyog sa gibati ron ni Sam. Since sa iyang pagka bata loner na siya. Nagbaton siya sa gitawag nga tawo nga dunay lonely heart.

“Na, mianhi gyud ko tungod

kang Mama. You know, mipauli siya kagabii. Well, gipasaylo namo siya ni Papa. Tinud-anay man sab ang iyang pagbasol.”

“Maayo nuon nga gitagaan ninyo siyag laing chance.” Wa ko isulti kang Sam nga nakita ko silang tulo kagabii sa ilang terrace.

“Di na siya motrabaho. Anha na lang siya sa among ba’ay ug moatiman namo ni Papa. Misugot man sab si Papa. Well, let’s say, aron paglikay sa laing tentasyon nga moabot ni Mama.” Miyangu-yango ko. “Nagkaestoryahay diay mo si Mama, Let?”

Ning higayona, gitug-anan ko si Sam sa among gipanagsultihan ni Nang Amelia. Misamot nga nalipay si Sam.

“Salamat, ha, Let, nga gidasig mo si Mama sa pagpauli. Gitagaan mo kuno siyag kaligon aron moatubang namo ni Papa ug mangayog pasaylo.” Mitando ko. Daghan pa mig giestoryahan si Sam. Wa siyay laing gihisgotan kondi ang pagkatibuok pag-usab sa ilang pamilya. Kon wa pa mopauli si Nang Amelia, unsa kahay mahitabo sa kinabuhi ni Sam, no? Hilom kong nakaingon.

Mipauli si Sam nga wa gyud mohupas ang gibati niyang kalipay.

Sa misunod nga mga adlaw, kanunay nang nagpamisitahan si Sam nako. Nausab na gyud siya. Kanunay na siyang nagmalipayon. Ug panahon sa kagabhion, magkanta-kanta siya sa paborito niyang love song sa ilang terrace. Maminaw ko niya samtang naglingkod ko sa among

terrace. Ug kon makita ko niya, mokaway siya nako. Baslan ko sab siyag warawara sa akong kamot.

Usa ka gabii nga namisita si Junry nako, gidaygan ko siya sa tinuod kong gibati niya.

“Sori gyud, ha, Jun. Inigsuon ra gyud ang feeling ko nimo.”

Magul-anon si Junry nga mipauli.