Pribadong grupo modumala sa bag-ong merkado sa Tabunok?

Hayan nga dumalaon sa pribado grupo ang gitukod karong modernong merkado sa Tabunok kon kana maoy mahukman sa Talisay Investment Economic Plan (TIEP).

Kini maoy gitataw ni Mayor Eduardo Gullas nunot sa kahadlok karon sa mga manindahay sa Tabunok nga kon mahuman na ang pagtukod sa merkado ipadagan kini sa pribadog grupo.

Samtang, ang siyudad modawat nalang unya og bayad gikan sa pribado kon si kinsa man ang mopadagan niini.

Gihimakak usab sa mayor nga misaad siya nga pabalikon dayon ang mga manindahay kon mahuman na ang phase-1.

Sa nasayran ang mga manindahay sa Tabunok Public Market mihangyo ni Mayor Gullas nga tumanon ang iyang saad nga kon mahuman na ang phase-1 pabalhinan gilayon kini aron mahimutang na usab ang ubang manin- dahay kon magsugod na ang phase-2 sa merkado.

Ang phase-1 na human na niadto pang Abril-8 duha ka buwan nga nag-una sa schedule base usab sa pagsunod sa kontraktor sa gusto ni Mayor Gullas nga ipadali ang paghuman sa proyekto.

Si Sherwin Chavez, presidenti sa mga manindahay, niingon nahadlok sila nga nag paglangan-langan sa pagpabalik nila sa puwesto bisan nahuman na ang phase-1 tungod kay adunay plano ang siyudad nga ipadumala kinig prebado.

Matod ni Mayor Gullas nga wala siya mosaad sa mga manindahay nga makabalik sila dihadiha kon mahuman na ang phase-1 ug samtang tukoron ang phase-2.

Si Gullas miingon nga ang iyang gisaad sa mga manindahay nga wala bisan usa kanila nga ma-displace samtang nagpadayon ang pagtukod sa merkado.

Iyang gisaad sa mga manindahay nga anha gihapon sila mamaligya sa Tabunok og dili ibalhin sa laing lugar samtang kini tukoron.

Si Gullas mipasabot nga kon siya ang padesisyonon, gusto niya nga siyudad maoy modumaa sa merkado.