You’re my one and only
Usa ana ka hapon, gikan kong nanimba kay Dominggo man, nag- window shopping una ko sa mga mall sa
downtown ug wa modiretso sa pagpauli. Naguba na man gud ang akong rubber shoes ug gusto kong motan-aw kon duna bay mga new arrival. Mag- jogging man gud kog
Sunday morning. Naandan ko na kini. Gani, kaganinang buntag sa akong pag- jogging, natiwas gyud sa pagkaguba ang mao kong sapatos.
Kalit kong nakahunong paglakaw sa sidewalk kay sa paglingi ko sa sulod sa usa ka fast food, maoy misugat sa akong panan-aw sila si Cherry ug Monsour nga nagsultihanay samtang nag-atubang paglingkod sa giokupar nga lamesa. Kalit lang kong gikulbaan. Seryuso silang duha. Matag karon ug unya moinom si Cherry sa iyang juice.
“Da, wa gyud ko masayop sa akong pagtuo. Nakagusto gyud si Cherry kang Monsour. Tingali, siya pa ang nangitag paagi nga magkadate sila ron!” Hilom kong nagyawyaw.
Sa akong kalagot, nagdali kong mibiya ug mipauli na. Milargo kog sulod sa akong kuwarto ug nakahilak gyud ko. May plano gyud lagi si Cherry nga ilugon si Monsour nako! Hilom kong nagbagutbot. Pagka gabii, gitawgan ko si Monsour sa selpon. Apan wa gyud siya motubag. Misamot ang akong kalagot ug gibating kakulba. Hain kaha sila ron si Cherry? Nanan-aw kaha silag sine? Wa kaha sila manulod og motel aron magtagbaw sa ilang kaugalingon? Bisag unsa na lay nasulod sa akong hunahuna. Wa gyud ko mahimutang. Dugay man gani kong nakatulog. Wa sab ko manihapon kay wa gyud ko ganahing mokaon. Ang grabeng selos nga akong gibati maoy diha sa akong hunahuna. Gibati gyud nako ang insecurities.
Pagka buntag, gitawgan ko si Cherry sa selpon. Pagtubag niya, gisudyaan dayon nako siya.
“Traydor kang pagka amiga, Cherry! Naa man untay daghang laki pero nganong si Monsour man gyud nga nakahibawo ka man nga uyab nako siya! Nakita ta mo, uy, kagahapon sa hapon sa sulod sa fast food!”
Gipawong dayon nako ang akong selpon. Wa ko hatagig higayon nga makatubag si Cherry. Seguradong mamakak siya ug ilimod niya nako nga nasayop ko sa akong gihunahuna niya. Mihangos ko sa kasuko. Gusto kong kumuton ang nawong ni Cherry!