Inahan, 50, gikagubtan sa social media kay nindot ang iyang lawas

Gikagubtan sa social media si Liu Yelin, 50, taga Xinyang, China human mikatap ang iyang mga litrato diin siya mipakita sa kahaom ug kanindot sa iyang lawas.

Si Yelin usa ka inahan nga gi-konsiderar nga “China’s fittest mom” diin way tatsa sa panit ug nindot kini og lawas sama sa 25-anyos nga babaye.

Ang mga litrato ni Yelin kauban sa iyang anak nga makita sa Mirror News ni-viral sa social media ug wa makatuo niini ang mga netizen nga iya diay kining anak.

Matud ni Yelin mogahin siya og duha ka oras nga workout matag adlaw sama sa pagdagan, paglangoy ug usa na niini ang pag-boxing.

Dugang ni Yelin nga importante nga lain-laing ehersisyo ang iyang buhaton aron ang iyang lawas makakuha og kalig-on.

Si Yelin naninuod sa iyang mga workout sa dihang nag edad na siya og 30-anyos.

Sa miaging tuig milangoy siya sa Malacca Strait diin kini nagdistansya og moabot sa 37 ka milya ug karong umaabot nga Septiyembre ning tuiga siya nagplano nga languyon ang Han River sa Seoul, South Korea nga adunay tunga sa milya nga gilay-on.