Voice of love
Miabot ang adlaw nga akong gikahinaman. First day sa akong pag-eskuwela sa college. Wow! Kanindot diay, uy. Daghan kaayong mga estudyante. Ug lain-lain ang akong mga propesor sa kada subject nako. Lain-lain sab ang akong classroom.
Sa pag- vacant period nako, miadto ko sa canteen. Gusto kong moesnak. Naagian nako si Kevin nga nanglimpyo sa usa ka lugar sa campus. Nakakita sab siya nako. Nahilaw ang iyang pinahiyoman. Nasabtan ko siya, Husto siya sa iyang giingon nako. Bation gyud niya ang kauwaw labi na nga bulingon ang iyang sinina. Nagpahiyom kong miduol niya. Gipakita ko ngadto niya nga wa ko tagda ang iyang pamustura. “Hi, Kevin!” “H-Hello!” “Tana, kuyog tas canteen. Mag-esnak ta.”
“Ikaw lang, uy, Janice. Daghan pa kog trabahuon.” Miyangu-yango ko. “Unsa man diay’ng orasa ang imong klase?” “Unya pang after lunch. One
o’clock. Pero ugma, buntag ang akong klase.” “Stay-in ka dinhi?” Mitando si Kevin. “Sige, Janice, moadto pa sa CR. limpyohan pa to nako. Usa kini sa akong trabahuon this day.”
Wa na ko makatubag kay mibiya na si Kevin nako. Igo na lang kong nangawot sa kong ulo. Unya mipadayon ko pag-adto sa canteen. Langas ang kauban kong mga estudyante. Nagkinataw-anay sila. Klaro nga malipayon sila. Ang uban, nagpundok-pundok sa pag-esnak sa usa ka lamesa. Tingali, daan na silang barkada. Hilom kong nakaingon.
Human kog esnak, mao say pagtingog sa bell. Migawas dayon ko sa canteen ug miadto sa classroom para sa akong next subject.
Panagsa ko na lang makita si Kevin sa misunod nga mga adlaw. Busy tingali siya sa iyang pagka working student. Ug kon magkakita mi, di siya makig-estorya og dugay nako. Biyaan dayon ko niya. Morag naglikay na si Kevin nako. Hilom kong naguol. Nasabtan ko nga gibati gyud siyag insecurities. Giisip gyud niya nga layo ra kaayo ang gintang sa among kinabuhi.
May mga gabii nga dugay kong makatulog. Mahunahuna ko si Kevin ug ang iyang ambisyon. Nalipay na lang ko nga naghunahuna ani. Sa hilom nag-ampo ko nga molampos si Kevin sa iyang pag-eskuwela. Unya, gikaila ko si John. Guwapo ug macho. Duna siyay kaugalingong awto. Anak sab siya og dato. Dali ra ming nagkasuod.