Rosaryohan sa sakyanan disturbo?
Kataw-anan kining bag-ong balaod nga gipasunod karon sa Land Transportation Office (LTO). Bawal ang mga gidayandayan sa mga sakyanan nga makabalda sa pagtagad sa mga drayber samtang nagmaneho sa ilang mga sakyanan sama sa rosaryahan, kurtina, signages ug uban pa. Gani, dako kaayo ang silot sa masakpan nga nakalapas sa maong mga gibawal. Maglisod man gani sila og pasunod sa Seat Belt law, pun-an na sab aning gitawag og Anti-Distracted Driving Law?
Bueno, igo lang nagpatuman ang LTO niining balaod. Di sila ang naghimo sa balaod og angay masabtan sa katawhan nga igo lang sila nagpatuman sa balaod. Trabaho lang, matod pa. Apan di kalikayan ang mga batikos sa katawhan. Kinsa ra man kaha ang madakpan sa mga taga LTO niining balaod? Mga pobre lang, matod pa sa uban.
Panahon sa checkpoint, kinsa man ang kasagaran parahon sa mga nagbantay sa checkpoint? Tanang sakyanan ba? Di ba libre ra nga molabay ang mga SUV sa mga adunahan, way hunonghunong, samtang ayuhon og tan-aw sa sulod ug sa gawas kon sakyanan sa mga pobre ang molabay?
Di na man gani abrihan ang pultahan o bentana sa sakyanan kon makita sa mga nagbantay sa checkpoint nga nindot ug mahalon ang sakyanan nga milabay. Apan kon baratuhon ra ang sakyanan, dugay kini nga hilngon sa mga nagbantay sa checkpoint. Sama ra nga kon baratuhon, dako og posibilidad nga mga masupakon sa balaod ang nagsakay niini.
Wa kini kalainan sa reglamento nga nagdili sa pagbutang sa mga rosaryohan isisp dayan-dayan sa mga drayber sa ilang sakyanan. Makadisturbo ba diay sa drayber ang rosaryohan? Unsa man diay ang rason nga magbutang man og rosaryohan ang drayber? Lisod kini sabton sa mga di Katoliko. Apan sa mga Katoliko, ang rosaryohan panagang sa mga disgrasya ug katalagman. Sa di pa modagan ang sakyanan, makita ang drayber nga mogunit sa rosaryohan, dayon panguros. Buot ipasabot, misangpit siya sa Ginuo nga unta giyahan sila ug ilikay sa mga disgrasya panahon sa ilang pagbiyahe. Inig labay sa simbahan, makita usab ang mga drayber nga manguros o kaha moduko sa ilang mga ulo. Kini nagpaila sa ilang pagtahod sa gahom sa Labawng Makagagahom ug pag-ampo nga unta kuyogan sila sa ilang pagbiyahe ug iluwas sila sa mga katalagman. Unya karon, tangtangon na hinuon ang rosaryohan kay makadisturbo sa mga drayber? Dakong tinunto.
Kon mag-istrikto ang taga LTO niining maong balaod, angay nila hunahunaon nga duna pa silay dapat tubagon sa katawhan. Nangolekta sila og kwarta alang sa plaka unya hangtod karon, wa pa nila mahatag ang mga plaka. Duna pa silay daghang nakolekta apan wa pa nila mahatag ang dapat nilang ihatag. Buot ipasabot, sila mismo nga taga LTO dunay dakong tulubagon sa katawhan.