Voice of love

Let's say nga sulagma lang ang among panagkita ug panagkaila ni John. First day nako sa workout sa gym nga duol ra sab sa akong gitunghaan. Nakahunahuna man gud ko aning workout aron duna sab koy exercise. Sa ingon, di ko motambok. Si John ang nagtudlo nako unsaon pag- workout ug dali ra ming nagkasuod sa misunod nga mga adlaw.

Law student si John. Maguwang siya nako. Apan morag puparehas lang mig edad. Kuan man gud, gawas nga guwapo ug macho siya, hamis ug puti siyag pamanit. Nagdako sab siya sa datong pamilya. Siyempre, duna gyud siyay vitamin nga gitumar. Kanunay sab gyud siyang nag-inom og juice ug nagkaon og mga prutas.

Usa ra ka university ang among gikuhaan og kurso. Kanunay ming magdungan pag-esnak sa canteen ug ingon man sa lunch. Malipayon ko uban kang John. Gugma na kaha ning akong gibati niya? Usahay dugay kong makatulog inig kagabii kay mahunahuna ko si John. Usa ka udto after sa among lunch ni John, nanulod mi sa library. Duna mi gi- research para sa tagsa-tagsa namo ka assignment. Nagtupad mig lingkod si John. Di kalikayan nga magkasaghid ang among mga bukton. Mabatyagan ko ang kainit sa iyang bukton. Unya magkatinan-away mi. Pagkahuman magpahiyomay mi.

“O, John, nganong duol ka man sa akong kasingkasing?” Makaingon na lang ko sa hilom.

“Wa bay masuko nako kon mamisita ko nimo, Janice?”

Nakahunong kog basa sa gikuptan kong libro. Nakatutok ko kang John. Seryuso siya. Aw, miseryuso sab ko.

“Wa man. Aw, sila si Mama ug Papa.” “Di diay gusto ang imog parents nga dunay laki nga mamisita nimo, Janice?”

“Well, pagtuo ko lang kana, John.”

Mikatawa ko. Mikatawa sab si John. Unya mibalik na sab mig tamod sa tagsa-tagsa ka libro nga diha sa among atubangan. Usahay magpasiplat ko kang John. Magpasiplat sab diay siya nako. Kon magkasugat ang among panan-aw, magpahiyomay mi. Kanindot sa akong feeling niadtong tungora. Morag nahigugma gyud ko kang John. Aw, maghuwat na lang ko nga iyang pangulitawhan.

Sa wa pa mi manggawas si John sa library, nangayo siyag address sa akong gipuy-an sa siyudad. Wa sab ko magduha-duha sa paghatag ani niya. (SUMPAYAN)