‘FULL ALERT’ GIISA SA CV

PRO 7 NANGANDAM SA POSIBLING PINISIK SA KAGUBOT SA MARAWI CITY

Gipaubos sa Police Regional Office (PRO) 7 ang tibuok Tungatungang Kabisay-an sa 'full alert status' isip pagpangandam sa posibling pinisik sa kagubot mugna sa pag-ataki sa Maute group sa dakbayan sa Marawi, Lanao del Sur niadtong Martes.

Si Chief Supt. Noli Taliño, direktor sa PRO 7, nimando sa tanang city ug provincial directors sa rehiyon nga ilusad ang higpit nga operasyon ug bantayan ang mga vital installations sama sa linya sa kuryente ug komunikasyon.

“Kahapon (Mates) pa nung nangyaring insidente sa Marawi nagpa alerto na tayo in fact, full alert ang status ng buong Philippine National Police. 'Yung normal na ginagawa natin target hardenning measure intensify ang intelligence monitoring at pinadagdagan natin ang check point operation,” matod ni Taliño.

Apan gipasabot ni Taliño nga walay labot ang rehiyon sa deklarasyon sa Martial Law sa Mindanao ug dili mabalaka ang publiko sa ilang makita nga daghang kapulisan ug subsob nga checkpoints.

Ang kapulisan gimandoan sa pag- duty tanan.

Giklaro niya nga wala sila maka- monitor nga dunay plano ang grupong Maute nga moabot sa Kabisay-an apan wala usab sila mokompyansa pinaagi sa pagpakig-alayon sa komonidad. Gimandoan usab niya ang

intelligence officers sa mga Cebu Provincial Police Office (CPPO) ug ug city police offices nga makig-alayon sa Muslim community alang sa pag-abag sa monitoring sa mga dayo nga gikan sa Mindanao.

Andam sila nga magpadala og personnel sa Mindanao kung dunay kamandoan gikan sa kampo Crame ug on standby nga mga pulis gikan sa Regional Public Safety Battalion.

Dinhi sa siyudad sa Sugbo, nagsugod na sa ilang hugot nga seguridad diin ang mga entry ug exit points gibantayan.

Si Chief Insp. Ramoncelio Sawan, information officer sa Cebu City Police Office, niingon nga dili tungod sa Martial law ang ilang paglusad sa subsub nga checkpoint sanglit kabahin pa kini sa ilang hugot nga seguridad niadtong naa pa ang presensya sa Abu Sayyaf sa lalawigan sa Bohol.

Wala na usab motugot si Sr. Supt. Joel Doria sa iyang mga sakop nga maka- leave of absence ug kinahanglan nga ang tanang personnel naka standby sa mga police station.

Wala siya motapos sa biyahe sa Russia tungod sa pag-ulbo sa kagubot sa Marawi.

Kagahapon, si Presidente Rodrigo Duterte subling namulong sa iyang deklarasyon sa Martial Law sa Mindanao atol sa press briefing sa Ninoy Aquino International Airport (NAIA) sa iyang pag-abot gikan sa Russia.

"If I think that ISIS has taken a foothold in Luzon, I might declare martial law throughout the country to protect the people," hulga ni Duterte.

Lakip sa gipahibalo ni Duterte mao ang pagsuspenso sa Writ of Habeas Corpus ug nideklarar lang og curfew sa piniling dapit sa Mindanao.

Atol ning pagsuwat, liboan ang namakwit ug pwerte katrapik ang national highway padulong sa dakbayan sa Iligan.

Sumala sa taho kagahapon gikan sa militar, lima na ang patay na pulis ug walo ang samdan nga naglakip sa sibilyan. Wala pa masayri ang habig sa Maute group. /