Mga lokal nga opisyal misuporta sa martial law sa Mindanao
Pipila ka mga lokal nga opisyal nga ningpadayag sa ilang pagsuporta sa pagdeklarar og Martial Law ni Presidente Rodrigo Duterte sa tibuok Mindanao.
Si Gobernador Hilario Davide III way supak sa maong deklarasyon nunot sa pagsiaw sa teroristang Maute group.
Samtang, gipadayag sa gobernador nga andam modawat sa mga molupyo nga namakwit dinhi sa Sugbo tungod sa kagubot ug tensiyon sa dapit.
Nasubo si Davide sa nahitabo nga kaguliyang sa Marawi City, diin nag-engkwentro ang mga sakop sa Maute group ug ang pwersa sa gobiyerno.
Samtang, nipaluyo ni Mayor Tomas Osmeña ug Bise Mayor Edgardo Labella ang pagdeklara ni Presidente Rodrigo Duterte og Martial Law sa Marawi City ug sa Mindanao gumikan sa hulga sa seguridad.
Ang mayor sa dakbayan sa Sugbo nibutyag nga dili siya ang angayan nga mohukom sa desisyon sa presidente ug suportahan ang desisyon.
“I'm not in the position to judge the President because I'm not from Mindanao. Just go along with him and ato siyang hatagan og benefit of the doubt,” padayag ni Osmeña.
Si Labella, sa iyang bahin, niingon nga makatarunganon ang deklarasyon ni Duterte gumikan sa presensiya sa hulga sa seguridad diin naapiki na ang katawhan ug ang iyang deklarasyon pinasikad sa batakang balaod.
“(Ang pagdeklarar og martial law) is provided under the Constitution that in case of imminent danger and to suppress lawless violence, which is happening now," matod ni Labella.