STRIP SEARCH SA CPDRC IPADAYON: DAVIDE, PDEA
Sama sa Phil. Drug Enforcement Agency, tinguha ni Gov. Hilario Davide III nga ipatuman gihapon ang strip search o ang pagpahubo sa mga piniriso kon dunay pagpangronda nga himuon sulod sa Cebu Provincial Detention and Rehabilitation Center (CPDRC).
Gihulagway ni Davide nga enlightening ug positibo ang nahitabo nga inquiry sa House subcommittee on correctional reforms sa niaging adlaw labot sa mga nahitabong kakulian sa CPDRC.
Si Davide, kinsa nabalik na gikan sa iyang pagtambong sa inquiry sa kauluhan, nagtuo nga wala nisupak ang mga kongresista sa gihimong strip search o pagpahubo sa mga piniriso atol sa greyhound niadtong Pebrero, gawas lang kang Kong. Gwendolyn Garcia.
Kon duna pa unyay mga greyhound operation nga himuon sa CPDRC, buot gihapon ni Davide nga ipatuman gyud ang strip search alang sa kaluwasan sa mga operatiba ug sa mga piniriso. Ingun niini sab ang baruganan sa PDEA atol sa inquiry.
Sa pagka-karon, miabot na ngadto sa 3,040 ang mga piniriso sa CPDRC. Ang gidaghanon sa mga piniriso usa sa gitumbok nga hinungdan nganong dili gyud masumpo ang padayong pagsulod sa mga kontrabando sa pasilidad.
Subay nini, wa’y plano si Davide nga suspensohon na usab ang pagpanawat ug mga piniriso gikan sa kalungsuran, sama sa gihimo sa miaging tuig. Gani matod niya, papun-an niya ang budget alang sa pagkaon sa mga piniriso.
Niadtong Martes sa gabii, 10 ka mga insular prisoners gikan sa CPDRC ang gipadala na ngadto sa Abuyog Penal Colony sa Abuyog, Leyte.
Subling gipadayag sa gobernador ang iyang tinguha nga itugyan na usab ngadto sa Bureau of Jail Management and Penology (BJMP) ang pagdumala sa CPDRC.
Kon mahitabo kini, hayan nga mahimong magbutang ang BJMP ug bag-o nila nga mga gwardiya o kaha ipaubos sa mas subsob nga training ang kasamtangang mga jail guard.
Bisan ug itugyan sa BJMP ang CPDRC, gipadayag ni Davide nga pabiling iya sa probinsiya ang pasilidad o ang prisohan. /