Task Force tukoron aron sa pagpangita sa 8 anyos

Task Force Jacel (Erguelles) umolon sa kagamhanan sa dakbayan sa Lapu-Lapu aron sa pagpangita sa otso anyos nga bata kinsa missing sulod na sa tulo ka adlaw human miulbo ang sunog sa barangay Pusok niadtong Domingo.

Gitahasan ni Mayor Paz Radaza ang City Disaster Risk Reduction Management Office, kapulisan ug ang barangay official sa Pusok sa pagpangita sa maong bata.

Puno sa kabalaka si Ginang Francisca Nacional nga ang ikatulo sa iyang upat ka mga anak babaye nga si Jacel ang wa na igkita human sa katalagman nga ilang nasinate.

Matod pa nga nalukop na nila ang pribado ug publikong tambalanan sa Lapu- Lapu ug Vicente Sotto Memorial Medical Center sa pagsusi sa pamasin nga nadala sa tambalanan gumikan sa mga paso nga naangkon, apan wa ang maong bata.

Samtang si SFO1 Hadjiloden Samonte sa Lapu-Lapu City Fire District nga way ‘human remains’ nga ilang napalgan sa dapit sa nasunogan.

Sa laing bahin, andam ang Lapu-Lapu City government nga makig-alayon ni Secretary Michael Dino sa Office of the Presidential Assistant (OPAV) nga mangita og luna nga magsilbing relocation site sa mga informal settlers ilabi na niadtong mga nabiktima sa sunog.

Si Dino personal nga miduaw niadtong miaging adlaw sa Pusok National High School nga maoy evacuation site sa 337 ka pamilya kansang balay na-ugdaw gumikan sa napasagdan nga nagsiga nga kandila.

Gawas sa mga relief goods nga gitunol sa OPAV misaad si Dino sa mga nabiktima nga moabag nga makabalik sa ilang naandan nga gipuy-an sa Sityo Matumbo ang mga biktima nga gikatahong pribadong gipanag-iya ang luna.