Abad mihimakak sa pasangil, miinsister nga 'agaw' ni Duterte
Lider ug adviser sa grupong gitawag og New Young Pilipino Defenders (NYPD) nga si Rey Duterte Abad mihimakak sa pasangil nga siya naghasi ug nagpabuto sa iyang armas atol sa mitumaw nga kagubot kalabot sa yuta sa barangay Tabunok, dakbayan sa Talsiay.
Hinuon iyang gibarugan nga ig-agaw gyud siya ni Presidenti Rodrigo Duterte,tungod kay ang presidenti ug iyang inahan first degree cousin.
Iyang usab nga giklaro nga wala kini niya ipanghambog.
Una niini nahimong kontrobersiyal ang NYPD tungod sa pag-adto niini sa yuta nga giilogan sa duha ka grupo sa sityo Dawis, barangay Tabunok.
Matod pa nga mga armado ug nagpabuto sa armas ang maong grupo.
Si Abad miingon nga tinuod miadto sila sa lugar niadtong Biyernes (dili Sabado base sa report) ug wala sila magpabuto ug wa usab sila manghulga.
Matod niya nga malinawon ang ilang pag-adto dili sila mga armado.
Iyang gipasabot nga adunay miduol kanila og nagpatabang tungod kay dili na sila makaagi sa karsada human gikoral. Kini maoy hinungdan ilang giadto ang dapit sanglit aduna man usay mando ang korte nga dili mahimong makoral ang dapit nga agianan sa mga tawo.
Nagkanayon si Abad nga tinuod nagpaila siya sa iyang pangan nga adunay Duterte apan wala kini niya gipanghambog ug gigamit ang presidenti aron ipanghulga.
Hinuon miangkon si Abad nga aduna usab silay sayop nga wala sila mo-coordinate sa kapulisan sa Talisay sa ilang pag-adto sa dapit.
Si Abad miingon nga ang miadto sa dapit sa adlawng Sabado nga nagpabuto sa armas kuyog ang mga sibilyang nga naka-armas dili na kadto ilang grupo kon dili gitawag kadto og unified force nga wala na sila makaila sa lider.
Giklaro usab sa pangulo sa NYPD nga si Butch Ilagan nga ang ilang grupo bulontaryo apan accredited sa PRO-7 isip mga force multiplier sa PNP.
Sa samang higayon, ilang gipasabot nga ang patches nga ilang gibutang sa ilang unipormi dili sa PNP kon dili logo sa PRO-7.
Hinuon si Abad miingon nga gimandoan na sila ni Talino nga aron paglikay sa kasamok ug kontrobersiya ipatangtang nalang ang tanang patches sa ilang unipormi.
Si Abad miingon nga andam silang mosunod niini apan wala kini magpasabot nga mohunong na sila sa pagsuporta sa kapulisan sa nasud ilabi na sa PRO-7.