Hinanggaw nga sugyot

Usa ka dakong hinanggaw kining sugyot nga ipa- drug test ang mga piniriso sa Cebu City Jail. Para unsa man? Nag-usik-usik lang kini sa budget sa pagpalit og drug test kits. Si jail warden Supt. Arnel Peralta misugyot og mihangyo sa City Government nga ayudahan ang Bureau of Jail Management and Penology (BJMP) sa pagpa-drug test sa mokabat 4,000 ka mga binilanggo sa City Jail.

Kini gumikan kay naghitak ang pagpasulod og paggamit og illegal nga drugas sa mga binilanggo. Unya ang "kanhi laos nga pulitiko" misuporta pod sa maong plano. Ang Cosap maoy mopahigayon sa drug test. Ang drug testing kit mobalor og P75 matag usa.

Aber, unsa may tumong ni Peralta niini? Kon mapahigayon kini ug adunay daghang mag-positibo unsa may iyang himuon sa mga magpositibo? Iyang ipa-rehab? Ug asa man niya ipa-rehab? Iya bang ipabartolina? Iyang pagawson ba kaha o lunggoan og liog?

Nag-usik-usik lang na ug kuwarta. Expected nga daghang mga adik diha sulod sa jail gumikan sa paghitak sa illegal nga drugas. Naa man gani diha ang druglords. Ang angayan unahon pagpa- drugtest ni Peralta mao ang iyang mga tawo sa BJMP. Unya paghugtan ang ilang tinarong nga pagmonitor sa illegal nga drugas diha sa sulod. Kon walay drugas nga makasulod diha sa city jail o sa bisan asang jail facility, walay adik nga mga piniriso. Asa man sila mokuha ug supply sa drugas?

Kanang pagpa-ubos sa drug test maayo lang ka na sa mga opisyal ug kawani sa gobiyerno o pribadong kompaniya kay aduna may control ang mga opisyal sa gobiyerno. Kinsa tong mga kawani nga nagpositibo angayan ipa-rehab o silutan pinaagi sa pagtangtang kanila. Pero sa mga piniriso, wala nay pulos. Sa iningles pa, "exercise in futility." Marka bahala na nang mga piniriso.

DRUG DEN

Sus, pagkasayang sa budget sa pagtukod anang Lagtang Public Market sa Talisay City niadtong una pangtermino ni Mayor Eduardo Gullas. Gi-abandonar na karon ang merkado kay ang mga manindahay mobalik naman sa Tabunok Public market gitukod gihapon ni Gullas.