Martial law sa Mindanao
Mibanaw na usab ang dugo sa dakbayan sa Marawi, Lanao del Sur nga gitawag og "Cradle of Islamic Civilization" sa Pilipinas tungod sa pag-ataki sa bandidong Maute group niadtong hapon sa Mayo 23. Alas 10 sa gabii, Mayo 23, ang tigpamaba sa Palasyo nga si Ernesto Abella nipahibalo nga si Presidente Rodrigo Duterte nga atua sa Russia nideklarar og martial law sa tibuok Mindanao.
"The President has called me and asked me to announce that as of 10 p.m. Manila time, he has already declared Martial Law for the entire island of Mindanao," matod ni Abella. Si Duterte wala motapos sa iyang offical visit sa Russia ug mouli sa Pilipinas tungod sa duguong hitabo sa Marawi.
Apan ang deklarasyon ni Duterte nimugna og nagkalainlaing reaksiyon. Dunay uyon ug dili uyon. Dunay nag-ingon nga sayo ra ang pagdeklarar og Martial law human dili na kini bag-o nga pag-ataki sa Maute group sa samang dapit.
Bisan unsay rason, ang kagubot sa Mindanao dili tiaw. Nagpadayon sulod na sa pipila ka siglo. Apan ang samang problema ug solusyon nagbalikbalik. Nasuwayan ang peace talk ug laing grupo na sab ang motumaw, sama sa pagsanong sa peace agreement sa Moro National Liberation Front (MNLF) ni Nur Misuari sa panahon kanhi President Fidel Ramos, apan nisiak ang uban ug nagtukod sa Moro Islamic Liberaration Front (MILF) ni Hasim Salamat. Dihang nilagda sa peace agreement ang MILF tali sa administrasyon ni kanhi Presidente Benigno Aquino III, nikusog ang laing grupo nga gitawag og Abu Sayyaf ug karon ang Maute.
Kagahapon, sumala sa taho, usa ka pulis na ang patay ug lima ka mga sundalo ang samdan sa nagpadayong engkwentro batok sa bandidong Maute.
Ang Martial law sa Mindanao haom kaha? Hinuon, ang deklarasyon ni Duterte moluntad lang og 60 ka adlaw. Tan-awon nato kon unsay epekto sa dapit nga nabungog na sa buto sa armas.