Ang pobreng kabaw
Human ni nakadawat og daghang pagsaway, temporaryong gihunong ang pag-implementar sa Anti-Distracted Driving Act (ADDA), ang balaod nga nagdili sa mga butang o buhat nga maghatag og linga sa mga drayber.
Nag-una dinhi ang paggamit og mga gadget sama sa selpon. Matod pa sa mga awtoridad, daghan nang aksidente sa kadalanan ang nahitabo tungod kay ang drayber naggamit og selpon samtang nagdrayb.
Diha bitaw koy nasakyan nga taxi kausa. Paglingkod nako miingon dayon ko “maayong hapon bay” kay mao may akong naandan. Wa ko tubaga sa kanahan kay naa diay siyay kaistorya sa selpon.
Wa siya nagkupot sa iyang selpon kay nag-earphone man. Ang iyang selpon nagbitay sa may dashboard dapit.
“Sa SunStar ko bay,” ako siyang giingnan. Wa gihapon motubag ang kugtong, pero kahibawo ko nakadungog siya kay milingi man nako, dayong balik sa iyang kaistorya. Mora bag gisamokan nga naa ko.
Kay di man ko niya tagdon, naminaw na lang ko niya: “Ganahan kaayo ko ato imong gisul-ob gahapon, sexy kaayo ka… lagi, angayan ka og ing-ato, palitan tika…. Yellow? Hayaga oy, mas hot ka sa black… hahaha, harmless ko oy, bisan imo pang pangutan-on si mama…”
Nagpakyut ang buang wa gani paki nga hapit niya mabanggai ang nanindag trapo nga milabang.
Nakahinumdom ko atong tawhana kay pag-agi namo sa Santo Rosario, gihapyodniya ang rosaryohan nga nagbitay sa rearview mirror. Bisan sa iyang ka-chick boy, relihiyoso si kuya. Kining rosaryohan usa sa mga nahisgotan nga apil kuno sa mga gidiling butang ubos sa ADDA. Pwerte intawong putak-putak sa mga katoliko.
Di ko relihiyoso, ambot kanus-a tong kataposan nakong pagrosaryo. Apan wa pa ko kakitag sakyanan nga nadisgrasya kay ang drayber naghapyod-hapyod og rosaryohan. Samot nang wa pa ko kasugat og drayber nga nagrosaryo samtang nag-drayb, sama ini:
Pasahero: Lugar lang sa eskina, kuya.
Drayber: The third sorrowful mystery is the crowning with thorns...
Pasahero: Kuya ninglapas na ko…
Drayber: Hail Mary full of grace…
Pasahero: Kuya naay kabaw milabang…
Drayber: Glory be to the Father…
Kabaw: Gibanggaan ko’s amaw!
Maayo ra pud nga gi-suspend ang implementasyon sa ADDA aron maistudyohan ang implementing rules and regulations ini. Kinahanglang maplantsa ni pag-ayo alang sa kaayohan sa mga motorista, sa mga pasahero ug sa kabaw.