TEEN ROMANCE Voice of love
Sa paniid ko kang John, puwerte gyud niyang lipaya nga gihatagan ko siyag address sa akong gipuy-an sa siyudad. Karon pa lang gani, nakaingon na ko sa hilom nga na- in-love gyud siya nako.
Klaro kaayo sa iyang tinannako ug sa iyang mga lihok, uy!
Dihang nakagawas na mi si John sa library, gikuptan niya ang akong kamot. Nakahunong ko paglakaw. Mitan-aw ko sa kamot ni John nga nagkupot sa akong kamot. Unya gitan-aw ko siya. Seryuso ko. Namuwa ang nawong ni John. Nauwaw tingali. Gikuha niya ang iyang kamot.
“S-Sorry, Janice. Wa lang ko makakontrol sa akong gibati ron.”
Gusto kong klaruhon ang giingon ni John. Apan gilabi ko na lang ang pagpakahilom. Unya wa lang nako damha nga nakatan-aw ko sa usa ka direksyon sa campus. Sa maong lugar, nakita ko si Kevin nga nagtindog ug nagtan-aw namo ni John. Mikuba ang akong dughan. Seguradong nakakita siya sa pagkupot ni John sa akong kamot. Unya milkaw si Kevin. Nagduko siya. “Nakaila ka niya, Janice?” Igo ko lang gipasiplatan si John. Unya mitando ko.
“He’s my childhood friend.”
Gisulti ko kang John kon unsa si Kevin sa eskuwelahan. Mikatawa siya.
“Mao diay nga naglago lang siya, Janice. Aw, gikan tingali siya sa CR kay nanglimpyo. Ingon man gyud ani ang working student nga stay-in sa eskuwelahan.”
Wa ko makagusto sa nakita kong reaksyon ni John. Wa koy tingog nga gibiyaan ko siya. Milargo ko sa akong classroom. Para nako, usa ka pagbugal-bugal kang Kevin ang pagkatawa ni John.
Pagka gabii, human ko manihapon, misulod na ko sa akong kuwarto. Si Nang Meding nga akong katabang ug kauban sa gipuy-an kong apartment, nanglimpyo sa kusina. Nagbasa-basa kog pocketbook samtang nagsandig ko sa headboard sa kama. Hilig ko na ang pagbasag detective story. Nakahunong ko pagbasa dihang may nanuktok sa pultahan sa akong kuwarto. Unya naabli kini ug misulod si Nang Meding.
“Naay laki sa gawas, Day Janice. Nangita nimo.”
“Sige, Nang. Adtuon ko siya.”
Si John ang lalaki nga giingon ni Nang Meding nga nangita nako. Malipayon kaayo siya. Gipasulod ko siya sa sala. Ambot ba, kalit man lang kong nawad-ag gana kang John. (SUMPAYAN)