Alias Steph Curry

JHUFEL M. QUERIKIOL Lilo-an, Cebu

Morag tulo na ni siya ka buntag makit-i nako, nga nagpraktis nga siya rang usa sa basketan atubangan ning akong gamayng tindahan. Kuha kaayo niya ang step back jumper ug deep threes ni Steph Curry. Hingigo ning bataa. Ang finger roll gikan sa foul throw ug ang floater sa shaded area Curry gyud kaayo. Mogamit sad siya og duha ka bola ilawom sa ring sa pagpraktis og dribble. Ang nakalahi lang nila ni Steph Curry kay imbis nga mag-sapatos mag-sinelas lang iyaha. Wala siyay knee pads. Dili sad siya mag-ingkit-ingkit og mouth guard kon mo-itsa siyag foul throw. Imbis blue ug yellow nga uniporme sa Golden State Warriors nga naay numero 30 sa likod, blue nga sinina lang nga giribitihan og yellow sa liog ug mga bukton. Klaro kaayong paborito niya ning t-shirta kay way lain gyud niyangs isulob kada buntag mao ra gyud kini ug shorts nga yellow og kolor.

Ganihang buntag wa ko makapugong, miduol na ko niya, bisag dihay nipalit og itlog.

“Dong, taga diin man ka? Karon pa ko kita nimo!” nangutana ko.

“Di man ko taga dinhi, Nong, pero naa ra ko sa akong tiya diha tabok sapa, ilawom anang dakong punoan sa buli!” Mitubag ang bata human mohunong sa iyang pagpraktis og itsag three points.

“Aw, pag-umangkon kang Delia asawa ni Cardo dong?”

“Oo, Nong sakto ka!” Mi-dribble siyag duha ka behind the back dayon mi-stepback ug mihanag itsa, pero gi-dribble niya pagbalik ang bola diha sa iyang tungod. “Bakasyon ra ko diri; wala na man guy klase.”

“Pila na may edad nimo, Dong, nga kuyaw na man kaayo ka mudag duwa. Morag si Steph Curry. Steph Curry imong idol, no?”

“Onse na ko. Grade six na ko inig abli sunod. Ay, layo ra kaayo ko ni Steph Curry, Nong, uy! Ganahan lang ko niya kay maayo kaayo mo-basket.” sa bata samtang sigeg hana-hanag crossover dapit sa iyang siko.

“Iverson diay, Dong, mao man toy idol pud nako adtong wa pa ko ma-stroke.”

“Oo. Ganahan pud ko niya kay siya may naka-imbento sa crossover.”

“Lagi, daghan na kaayo na siyag na-ankle breaker!” tubag nako. “Pero nganong di man si Steph Curry imong idol, Dong?”

“Aw, ganahan man ko niya, pero ang ako gyung idol kay…” Mihangad ang bata sa langit human gisangit ang bola diha sa iyang kilid.

“Si kinsa, Dong?” naghinamko nga makahibalo sa iyang ‘idol.'

“Ang akong idol kay…” Gigunitan sa bata ang sidsid sa iyang sinina ug gipahid sa iyang ilong nga kalit gisip-on. “Si kinsa man, Dong?” “Akong Papa!” Mikurog ang tingog sa bata ug mora kinig nawagtangag kusog kay kalit nga nahulog ang bola sa iyang kilid ug nalup-og siya sa free throw line.

“Ngano ka, Dong?” Giduol nako ang bata.

“Ang-ang … siya man gyuy nagtudlo nakog basketbol sukad sa grade two pa ko. Nya karon wala na man siya, patay na man.” Mihilak ug mibakho ang bata.

Ako lang siyang gipasagdan hangtod nga mibarog siya ug mibalik og itsa-itsa. Mibalik ko pagsulod sa akong tindahan kay dihay mopalit og edibol oyl. (KATAPUSAN)