Ang hataas nga pasensiya ni Melindo
Di nato ikalimod nga wa kaayo mahatagi og igong pagtagad ug daw sa wa kini makakuha og interest sa mga local boxing aficionados ang pag-away ni Milan Melindo sa Japan batok ni Akira Yeagashi alang sa world title niadtong Dominggo.
Kini tungod kay gawas nga nalingaw ang kalibutan sa sports sa nagkaanindot na nga mga duwa sa NBA, morag nawad-an na usab og interest ang mga nagsunod sa iyang mga away kay di naman gud ni unang higayon nga misuway siya paglangkat sa world title apan napakyas.
Una mao ang iyang pagpakigsangka ni Juan Francisco Estrada niadtong 2013 didto sa Macau diin siya nakahatag og saktong kombati apan gilupig siya sa mga uwahing round hinungdan sa iyang pagkapukan pinaagi sa unanimous decision.
Sa tuig 2015, laing kahigayonan ang naangkon sa 29 anyos nga lumad nga taga Cagayan de Oro apan ania sa Sugbo nagbasehan.
Ning higayona ang Puerto Rican world champion nga si Javier Mendoza maoy iyang gisuwayan of labni sa korona.
Sa gihapon pakyas si Melindo human giundang ang away sa referee ug mideklarar kaniya nga pildi pinaagi sa teknikal desisyon sa ikaunom nga round – butang nga gikahibulong sa ilang kampo.
Dihay higayon nga gihamok sa kontrobersiya ang boxing career ni Melindo (32-2, 13Kos) sa dihang na overweight kini sa iyang away didto sa Bacolod batok ni Maximino Flores sa Mexico.
Giangkon ni Melindo nga nawad-an siya og gana sa maong away tungod kay nagtuo man siya nga ang pagpakig rematch ni Mendoza maoy nakahan-ay sa maong away apan sa kalit lang nausab ang kamada.
Nitumaw usab ang mga pagduda nga naunlod na ang paglaom ug determinasyon niini nga makab-ot ang iyang pangandoy nga mahimong world champion human sa duha ka sunodsunod nga kapakyasan.
Apan sukwahi sa gituohan, sa hilom gidawat ni Melindo ang laing hagit nga maoy nakabalik sa iyang kadasig.
Iyang gibutyag, nga taliwala sa dakong kasagmuyo, aduna pa gihapoy mga tawo nga nagpikpikl ug nakapabuka sa iyang mga mata aron mobalik ang iyang lig-ong determinasyon.
Labaw sa tanan, iyang gihangad ngadto sa Kahitas-an, uban sa mga pangaliya nga unta mabuligan ug magiyahan siya sa saktong dalan. (Sumpayan ugma)