PBA head statistician mopahigayon og seminar sa Cebu

Gikatakdang moanhi sa Sugbo ugma, Mayo 26, ang beteranong head statistician sa PBA ug FIBA-licensed statistic instructor nga si Fedil Mangonon aron pagpahigayon og statistic seminar alang niadtong mga Sugbuanong interesado nga makat-on unsaon pagtali sa statistics sa basketball sa actual nga duwa.

Kini maoy gipahibawo sa giilang Cebuano hotshot sa PBA nga si Dondon Hontiveros, kinsa maoy nag-coordinate sa pagbisita ni Mangonon sa Sugbo.

Kinihanglan ang mosalmot sa maong seminar nagpangidaron og 21 anyos pataas ug aduna kini igong kasinatian sa paggamit og computer.

Di makawang ang mga nakat-onan sa maong seminar sa mga partisipante sanglit sugod sa Sabado, sila ang gamiton nga mga statistician sa tulo ka adlaw nga tournament sa DH25 18-under ug 13-under nga ipahigayon sa Cebu Coliseum gikan sa Mayo 28-31.

Walo ka mga teams ang mosalmot sa 18-under division samtang unom usab ka teams ang magtigi sa 13-under.

Sa 18 under ang magtigi mao ang Ormoc, GAB, Bukidnon Goodwill, Bukidnon faith, DH25, Don Bosco, Maasin Zip Soup ug Bukidnon Ravens.

Samtang mosalmot sa 13-under mao ang teams sa Don Bosco, Bukidnon Spearheads, Ormoc ug Moalboal.

Hangtod ning pagsulat padayon pang gi-negotiate kon asa ipahigayon ang seminar ug ingon man pila usab ang registration fee.

Alang sa dugang pakisayod mahimong mo-text og motawag ni Voltaire sa 0995 729 8928.